Finss.az - Macarıstanın Baş Naziri Viktor Orban, X sosial şəbəkəsində Avropa İttifaqının Rusiyaya qarşı tərtib etdiyi sanksiyaların ləğv edilməsini təklif edib.

Onun fikrincə, bu məhdudiyyətlər yalnız Avropa İttifaqına zərər verir və müharibənin bitməsinə heç bir təsir etməyib.

Orban qeyd edib: «Sanksiyalar haqqında danışmaq vaxtıdır! Onlar müharibənin bitməsinə səbəb oldumu? Xeyr. Rusiyanın iqtisadiyyatına zərər verdilərmi? Xeyr. Avropa, Rusiyadan olan enerji mənbələrini əvəz etmək üçün başqa əlverişli mənbələr tapa bildimi? Xeyr». Baş nazir, Brüsseldəki bürokratlar tərəfindən hazırlanmış sanksiyaların yalnız Avropa iqtisadiyyatının rəqabət qabiliyyətini məhv etdiyini bildirib.

Bu arada, Avropa İttifaqı ölkələrinin siyasətçiləri 16-cı sanksiya paketinin qəbul edilməsini müzakirə edirlər. Bloomberg-in məlumatına görə, paket, Rusiyanın mayeləşdirilmiş təbii qazından tədricən imtina edilməsi, alüminium idxalının qadağan edilməsi, Rusiyaya məxsus gəmilərə qarşı məhdudiyyətlər və bir neçə bankın SWIFT sistemindən çıxarılması ilə bağlı olacaq. Yeni sanksiya paketi 24 fevralda qəbul ediləcək.