Finss.az xəbər verir ki, Google-ın ana şirkəti Alphabet Inc. bazar ertəsi günü keçirilən ticarət sessiyası zamanı tarixi göstəriciyə imza ataraq bazar dəyərini 4 trilyon dollardan yuxarı qaldırıb.

Sessiya ərzində Alphabet-in səhmləri 1,7% artaraq səhm başına 334,04 dollara yüksəlib. Daha sonra qiymətlərdə cüzi korrektə müşahidə olunaraq səhmlər 0,2% ucuzlaşıb. Ümumilikdə isə şirkətin bazar kapitallaşması 2025-ci illə müqayisədə 65% artım göstərib.

CNBC-nin məlumatına görə, Apple şirkəti Siri səs köməkçisində Alphabet-in Gemini süni intellekt modelindən istifadə etmək qərarına gəlib. Media orqanlarının daha əvvəl bildirdiyinə əsasən, bu əməkdaşlıq Alphabet-ə ildə təxminən 1 milyard dollar gəlir gətirə bilər.

Qeyd edək ki, bundan əvvəl Nvidia, Microsoft və Apple də 4 trilyon dollarlıq bazar dəyəri həddini aşmışdı. Hətta Nvidia-nın bazar kapitallaşması artıq 5 trilyon dollardan çoxdur ki, bu da süni intellekt sektorunun qlobal texnologiya bazarındakı həlledici rolunu bir daha təsdiqləyir.

Analitiklər hesab edirlər ki, süni intellekt texnologiyalarının kommersiyalaşdırılması Alphabet-in uzunmüddətli artımını dəstəkləyən əsas faktor olaraq qalacaq.