İnvestisiya immiqrasiya məsləhət şirkəti "Henley Partners"ın hesabatına görə, bütün digər ölkələrlə müqayisə edildikdə Çinin bu il immiqrasiya səbəbindən ən çox dollar milyoneri itirən ölkə olacağı gözlənilir.

Fins.az "Bloomberg"ə istinadən xəbər verir ki, 2022-ci ildə Çindən 10 800 yüksək gəlirli şəxs mühacirət edib, bu il isə daha 13 500 nəfərin ölkəni tərk edəcəyi gözlənilir.

"Bu, pandemiya ilə başlayan bir şey deyil" -hesabatın yaradılmasına kömək edən qlobal sərvət kəşfiyyatı şirkəti olan "New World Wealth"in Tədqiqat Direktoru Endryu Amoils bildirib.

Çinin son on ildə hər il ən böyük milyonçu getməsi ilə üzləşdiyini deyən Amoils, “Son çıxışlar həmişəkindən daha çoxdur. Çin iqtisadiyyatı 2000-ci ildən 2017-ci ilə qədər güclü inkişaf edib, lakin o vaxtdan bəri ölkədə sərvət və milyonerlərin artımı (ABŞ dolları ilə ölçülür) əhəmiyyətsiz səviyyədə olub".

Henley Partners hesab edir ki, Çindən sonra Hindistan bu il ən çox milyonçu itirən 2-ci ölkə olacaq və 6500 milyonçu azalacaq. Bu rəqəm Hindistanın ötənilki itkisindən min nəfər azdır. Amoils, Hindistanın immiqrasiya səbəbindən itirdiyindən daha çox yeni milyonçu "istehsal etdiyi" üçün bu xaricə axının narahatçılığa səbəb olmadığını vurğulayıb. 

Dollar milyonçuları üzrə ən çox itkiyə məruz qalacağı gözlənilən üçüncü ölkə 3200 nəfərlə Böyük Britaniya, 4-cü yerdə isə Rusiyadır. Ukrayna müharibəsindən qaynaqlanan siyasi iğtişaşlara və iqtisadi qeyri-müəyyənliyə baxmayaraq, Rusiyanın bu il yalnız 3000 xalis milyonçu itirəcəyi gözlənilir; bu rəqəm 2022-ci ildə 8500 milyonçudan kəskin azalma deməkdir.

Honq-Konqun bu il 1000 xalis milyonçu, Cənubi Koreya və Yaponiyanın isə müvafiq olaraq 800 və 300 milyonçu itirəcəyi gözlənilir.

Zəminə Hüseyn
Fins.az