Finss.az xəbər verir ki, bazar ertəsi günü Avropa fond bazarları əsasən müsbət dinamika nümayiş etdirib. Fransa etalon indeksi istisna olmaqla, əksər aparıcı indekslər ticarət sessiyasını yüksəlişlə başa vurub.

Əsas Avropa şirkətlərini əhatə edən Stoxx Europe 600 indeksi 0,21% artaraq 610,95 bala çatıb. Böyük Britaniyanın FTSE 100 indeksi 0,16%, Almaniyanın DAX indeksi 0,57%, İtaliyanın FTSE MIB indeksi 0,03%, İspaniyanın IBEX indeksi isə 0,14% yüksəlib. Bununla yanaşı, Fransanın CAC 40 indeksi 0,04% azalıb.

Bazar iştirakçıları isə ehtiyatlı mövqe sərgiləyiblər. Buna səbəb ABŞ Federal Ehtiyat Sisteminin (FED) müstəqilliyini itirməsi ilə bağlı narahatlıqların yenidən gündəmə gəlməsidir. Xüsusilə, ABŞ Ədliyyə Nazirliyinin FED sədri Jerom Pauellə bağlı cinayət işi açmağa hazırlaşdığına dair xəbərlər investorların risk iştahasını məhdudlaşdırıb.

Analitiklərin fikrincə, ABŞ-da pul-kredit siyasətinə mümkün siyasi təzyiqlər qlobal maliyyə bazarlarında qeyri-müəyyənliyi artıra və Avropa birjalarında dalğalanmalara səbəb ola bilər.