Finss.az xəbər verir ki, mövcud hava proqnozlarına əsasən, 2026-cı ilin yanvar ayında Avropada hava temperaturunun son doqquz ilin ən aşağı səviyyəsinə düşəcəyi gözlənilir. Proqnozlara görə, yanvar ayı üzrə temperatur normadan 2 dərəcə, ötən ilin eyni dövrü ilə müqayisədə isə 3 dərəcə aşağı olacaq.

Mütəxəssislər bildirirlər ki, vəziyyət Avropadakı yeraltı qaz anbarlarında ehtiyatların orta hesabla 53,17%-ə enməsi fonunda daha da mürəkkəbləşir. Bu amil qış mövsümündə enerji təhlükəsizliyi ilə bağlı riskləri artırır.

Belə şəraitdə enerji sisteminin etibarlılığı əsasən istehlak məntəqələrinə yaxın yerləşən və çevik qaz mənbəyi hesab olunan yeraltı qaz anbarları hesabına təmin edilir. Lakin mövcud göstəricilər anbarlardan istifadənin intensivləşdiyini göstərir.

Belə ki, yanvarın ilk 12 günü ərzində Avropa Birliyinin yeraltı qaz anbarlarından orta qaz istehlakı son beş ilin eyni dövrü üzrə orta göstəricidən 1,6 dəfə çox olub.

Çərşənbə günü yayımlanan şərhdə Qazprom mütəxəssisləri qeyd ediblər ki, “Avropadakı yeraltı qaz anbarlarında qaz ehtiyatları tarixi minimum səviyyəyə yaxınlaşır”. Bu açıqlama yaxın həftələrdə Avropada enerji bazarlarında gərginliyin arta biləcəyinə işarə edir.