Türk Hava Yolları (THY) 2025-ci il üzrə sərnişin və yük daşımalarına dair statistik göstəricilərini açıqlayıb.

Finss.az xəbər verir ki, aviaşirkət ötən il ərzində sərnişin sayını 8,8% artıraraq 92,6 milyon nəfərə çatdırıb.

Dekabr ayı üzrə oturacaq-kilometr (AKK) üzrə tutum illik müqayisədə 9,2% artıb. Beynəlxalq reyslərdə doluluq səviyyəsi 82,6%, daxili reyslərdə isə 82,7% təşkil edib. Həmin ay tranzit (xaricdən-xaricə) sərnişinlərin sayı 2,8 milyondan 3,2 milyona yüksəlmiş, ümumi AKK həcmi 23,3 milyard səviyyəsinə çatıb. Daşınan yük və poçt həcmi dekabrda illik müqayisədə 15,9% artaraq 192,4 min ton olub.

2025-ci ilin yanvar–dekabr dövrünü əhatə edən göstəricilərə görə, THY-nin ümumi sərnişin sayı 8,8% artaraq 92,6 milyon nəfərə çatıb. Tranzit sərnişinlərin sayı isə 12,8% artaraq 35,7 milyon olub. İl ərzində ümumi doluluq səviyyəsi 83,2% təşkil edib; beynəlxalq reyslərdə 82,9%, daxili reyslərdə isə 86% səviyyəsində qeydə alınıb.

Ümumi təklif olunan oturacaq-kilometr həcmi 2024-cü ildə 254,1 milyard, 2025-ci ildə isə 273,2 milyard səviyyəsinə yüksəlib. Yanvar–dekabr dövründə daşınan ümumi yük və poçt həcmi 2,2 milyon tona çataraq illik 8,4% artım göstərib. 2025-ci ilin dekabr ayının sonunda THY-nin hava donanmasında 516 təyyarə olub.

Fuad Mədətov
Finss.az