Finss.az xəbər verir ki, Amerikanın Excelerate Energy şirkəti, mayeləşdirilmiş təbii qaz (LNG) idxalı üçün İraqda üzən terminal (FSRU) layihəsinə dair İraq hökumətindən rəsmi mükafat məktubu alıb. Bu təşəbbüs, ölkənin enerji sektorunda şaxələnməni təmin etmək və İrandan enerji asılılığını azaltmaq məqsədi daşıyır.

Məlumata görə, bu layihə İraqın enerji təhlükəsizliyi baxımından strateji əhəmiyyət daşıyır. Belə ki, İran qazı və elektrik enerjisinin idxalına ABŞ sanksiyalarının təsiri artdıqca, Bağdad hökuməti alternativ enerji təchizatçıları və mənbələri axtarışını intensivləşdirib.

Excelerate Energy-yə verilən mükafat məktubu yalnız ilk addımdır. Layihənin həyata keçirilməsi isə danışıqların uğurla tamamlanması və kommersiya sazişlərinin imzalanmasından asılı olacaq. İraqın Neft Nazirliyi bu sahədə təcili tələbat səbəbindən LNG idxalı üçün tenderi yenidən elan edib.

South Gas Company (SGC) rəhbəri Həmzə Əbdül Baqi bildirib ki, İraq İran qazı itkisinin əvəzini çıxmaq məqsədilə FSRU (üzən LNG terminalı) icarəyə götürməyi planlaşdırır. ABŞ-ın İranla qaz ticarətini də sanksiyalara məruz qoyacağı təqdirdə, Qətər və Oman kimi ölkələr alternativ təchizatçılar kimi nəzərdən keçirilir.