Finss.az xəbər verir ki, Rusiya hökumətinin 2026-cı il üçün federal büdcə layihəsinə əsasən, üzümçülük və şərabçılıq sahəsinə ayrılan subsidiyalar 7,7%, tərəvəzçilik və kartofçuluq sahəsinə isə 5,2% azaldıla bilər.

Büdcə izahat sənədinə əsasən, “Üzümçülüyün və şərabçılığın inkişafının stimullaşdırılması” adlı federal proqram çərçivəsində 2025-ci ildə bu sahəyə 4 milyard 293,5 milyon rubl, 2026-cı ildə isə 3 milyard 963,4 milyon rubl ayrılması planlaşdırılıb. Növbəti illərdə isə subsidiyaların daha da azaldılaraq 2027–2028-ci illərdə 2 milyard 903,4 milyon rubl səviyyəsinə düşməsi nəzərdə tutulur.

Digər kənd təsərrüfatı istiqaməti olan “Tərəvəzçiliyin və kartofçuluğun inkişafı” proqramı üçün də maliyyə dəstəyi azalacaq. 2025-ci ildə bu sahəyə 3 milyard 691,7 milyon rubl ayrılması planlaşdırıldığı halda, 2026–2028-ci illərdə bu rəqəm 3,5 milyard rubl səviyyəsində sabitləşdiriləcək.

Ekspertlərin fikrincə, subsidiyaların azaldılması regionlarda kənd təsərrüfatı məhsullarının istehsalını yavaşlada, fermerlər üçün maliyyə təzyiqlərini artıraraq, yerli bazarda qiymət artımına səbəb ola bilər.

Hökumətin bu qərarı bölgə büdcələrinin yükünü artırmaqla, özəl sərmayələrin və texnoloji modernizasiyanın ön plana çıxmasına təkan verə bilər.