Avropa Yenidənqurma və İnkişaf Bankı (AYİB) Azərbaycanda özəl sektora dəstək layihələrinin mərkəzindədir. Keçən il bankın ümumi investisiyalarının 74%-i birbaşa özəl sektor layihələrinə yönəldilib.

Finss.az xəbər verir ki, bunu bankın nümayəndəsi Real Hacıyev Bakı İqlim Fəaliyyəti Həftəsində (BCAW2025) çıxışı zamanı bildirib.

Onun sözlərinə görə, AYİB özəl sektor təşəbbüslərinə təxminən 5 milyard dollar cəlb edib. Hacıyev qeyd edib ki, hər 1 dollar AYİB investisiyası 2 dollar həcmində əlavə maliyyə cəlb etməyə imkan verir, bu da ölkədə iqlim keçidinə dəstəkdir.

O, əlavə edib ki, bərpa olunan enerji və iri infrastruktur layihələri əsas üsuldur və AYİB layihə sponsorlarını qarışıq maliyyələşdirmə və texniki yardım vasitəsilə təşviq edir. Məsələn, Qaradağda keçirilən 100 MVt gücündə günəş paneli hərracını AYİB dəstəkləyib.

R.Hacıyev həmçinin bildirib ki, iqlim maliyyəsi yerli banklar vasitəsilə kiçik və orta şirkətlərə yönəldilir. Belə layihələr arasında izolyasiya, enerji itkilərinin azaldılması və yağış suyundan istifadə tətbiqləri var.

AYİB-in strategiyası ölkədə iqlim keçidini həm iri layihələr, həm də kiçik təşəbbüslərlə dəstəkləməkdir.