Finss.az xəbər verir ki, Avropada qışın getdikcə sərtləşməsi qaz qiymətlərinin yüksəlməsinə səbəb olub. Həftənin əvvəlindən bəri spot qaz qiymətləri durmadan artır. Çərşənbə günü Avropa TTF mərkəzlərində gün ərzində ticarət həftənin əvvəlindən 11% artımla min kubmetr üçün 387 dollardan bağlanıb.

Analitiklər bildirirlər ki, sıfır dərəcəli və mənfi temperaturun daha tez-tez müşahidə olunması enerji bazarını daha da gərginləşdirir. Vəziyyəti çətinləşdirən digər amil isə külək enerjisi istehsalının azalmasıdır.

Məlumatlara görə, çərşənbə günü AB-də külək enerjisi regionun enerji istehlakının yalnız 15%-ni təşkil edib, halbuki ötən həftə bu göstərici iki dəfə çox idi. Bir il əvvəl, 2025-ci ilin yanvar ayında, enerji istehsalında külək enerjisinin orta payı 20% təşkil edirdi. Bu azalma Avropada enerji balansına təzyiq göstərir və qaz tələbatını artırır.

Mütəxəssislər hesab edirlər ki, qışın sərt keçməsi və alternativ enerji istehsalının azalması qaz qiymətlərinin yaxın həftələrdə də yüksək qalmasına səbəb olacaq.