Avqustun 30-da Dövlət Turizm Agentliyi tərəfindən Şüvəlan qəsəbəsində yeni ictimai çimərliklərə mediatur təşkil olunub.

Finss.az xəbər verir ki, tədbirdə çıxış edən Agentliyin Qoruqları İdarəetmə Mərkəzinin İdarə Heyətinin sədri Murad Ağabəyli yay mövsümündə çimərliklər və turizm fəaliyyəti ilə bağlı açıqlamalar verib.

Yeni ictimai çimərliklər: pilot layihə və infrastruktur

M.Ağabəyli bildirib ki, yay mövsümünün əvvəlindən yerli və xarici turistlərin çoxsaylı müraciətləri əsasında Abşeron yarımadasındakı çimərliklərdə monitorinqlər aparılıb. Monitorinqlər nəticəsində bəzi ərazilərdə sanitar-gigiyenik vəziyyətin və minimal infrastrukturun olmaması aşkar edilib. Bu səbəbdən pilot layihə hazırlanıb və işlərə başlanılıb.

"Şüvəlan ərazisində iki çimərlik birləşdirilərək bir çimərlik kimi, ümumilikdə isə beş mövcud çimərlik əsasında yeni, daha böyük üç ictimai çimərlik yaradılıb. Bu çimərliklər tamamilə ictimai əhəmiyyət daşıyır və ödənişsizdir", – deyə M.Ağabəyli bildirib.

Yeni çimərliklərdə dövlət-özəl tərəfdaşlığı çərçivəsində bir sıra infrastruktur qurulub: ümumi avto-dayanacaq, uşaq və əyləncə meydançaları, futbol və voleybol meydançaları, sanitar qovşaqlar, soyunub-geyinmə otaqları, duşlar, çətirlər, şezlonglar və söhbətgahlar. Turistlər bu imkanlardan tam ödənişsiz istifadə edə biləcəklər.

M.Ağabəyli vurğulayıb ki, çimərliklərdə əsaslı tikililərə icazə verilmir, yalnız konteyner tipli yüngül obyektlərdən istifadə olunacaq. Sahibkarlar isə kiçik kafe və satış köşkləri vasitəsilə həm gəlir əldə edə, həm də çimərliklərin təmizliyini təmin edə biləcəklər.

Qoruqlar və turist axını

Dövlət Turizm Agentliyinin məlumatına görə, bu ilin yanvar-iyul aylarında Azərbaycandakı qoruqları ziyarət edən şəxslərin sayı ötən ilin eyni dövrü ilə müqayisədə 65% artıb. Xarici turistlərin artım tempi isə 67–68% təşkil edib.

Tarixi abidələrdə bərpa işləri

M.Ağabəyli əlavə edib ki, Agentlik bir sıra tarixi abidələrin bərpası ilə bağlı işləri sürətləndirib. Onun sözlərinə görə:

• İsmayıllı rayonunun Basqal qəsəbəsində məscidin bərpası yekunlaşmaq üzrədir.
• Şəkidə arxeoloji park və digər bərpa işləri davam edir.
• Ağdamdakı Şahbulaq qalasında isə infrastruktur işləri həyata keçirilir.
• Partizan Məmmədin adına muzey yaradılması planlaşdırılır.

"Bu tədbirlər həm turizm imkanlarını artırır, həm də ölkəmizin mədəni irsini qorumağa xidmət edir", – deyə Agentlik rəsmisi əlavə edib.

Fuad Mədətov
Finss.az