Şüvəlan qəsəbəsində yeni ictimai çimərliklər istifadəyə verilib və yay turizm mövsümünün ilkin nəticələri açıqlanıb.

Finss.az xəbər verir ki,avqustun 30-da Dövlət Turizm Agentliyi tərəfindən Şüvəlan qəsəbəsində yeni ictimai çimərliklərə mediatur təşkil olunub. Tədbir zamanı yay turizm mövsümünün ilkin nəticələri açıqlanıb və dövlət-özəl tərəfdaşlığı çərçivəsində həyata keçirilən abadlıq işləri barədə məlumat verilib. Hazırda Şüvəlanda 5 sahibkarın fəaliyyət göstərdiyi 3 çimərlik mövcuddur.

Qeyd olunub ki, mövsümün əvvəlindən Abşeron yarımadasındakı çimərliklərlə bağlı yerli və xarici turistlər tərəfindən çoxsaylı müraciətlər daxil olub. Monitorinqlər nəticəsində bəzi ərazilərdə sanitar-gigiyenik vəziyyətin, infrastrukturun, tullantıların idarə olunmasının və sahil zolağının təmiz saxlanılmasının qənaətbəxş olmadığı müəyyən edilib. Bununla bağlı Nazirlər Kabinetinin tapşırığı əsasında Xəzər rayonunun Şüvəlan qəsəbəsində müasir tələblərə cavab verən 3 ictimai (ödənişsiz) çimərlik yaradılıb.

Pilot layihə çərçivəsində 15,3 hektar ərazidə taxta döşəmələr, sanitar qovşaqlar, futbol və voleybol meydançaları, uşaq əyləncə zonaları, söhbətgahlar, günəşdən mühafizə çətirləri və digər zəruri avadanlıqlar quraşdırılıb. Bu layihə dayanıqlı turizmin inkişafına töhfə kimi qiymətləndirilir.

Məlumata görə, yay mövsümü Azərbaycanda daxili və gəlmə turizmin ən aktiv dövrüdür. Ölkəyə gələn hər üç əcnəbi turistdən biri (32 faiz) məhz yay aylarında səyahət edir. Bu dövrdə Yaxın Şərq, Şimal-Şərqi Asiya və Avropadan gələn turistlərin sayında artım müşahidə olunur. MDB ölkələrindən gələn ziyarətçilər arasında isə çimərlik turizmi xüsusilə populyardır.

Eyni zamanda, daxili turizm göstəriciləri də yay mövsümünün əhəmiyyətini təsdiqləyir. Son illərdə il ərzində yerli turistlərin həyata keçirdiyi ölkədaxili səfərlərin ümumi sayı 20 milyondan çox olub ki, onun da təxminən 40 faizi yay aylarının payına düşür.

Hazırda Azərbaycanda 200-dən çox çimərlik mövcuddur. Onların əsas hissəsi Bakı, Sumqayıt, Xaçmaz, Lənkəran, Astara və Mingəçevirdə yerləşir. Ümumilikdə ölkə üzrə çimərliklərin 80 faizi Bakı və Abşeron yarımadasında, burada isə 17 çimərlik zonası mövcuddur.

Fuad Mədətov
Finss.az