Finss.az - Hindistan hakimiyyəti Qərbi Benqal ştatında Nipah virusuna yoluxanların sayının beş nəfərə çatmasından sonra infeksiyanın lokallaşdırılması üçün təxirəsalınmaz tədbirlər görür. Bu barədə The Independent qəzeti məlumat yayıb.

Məlumata görə, ilk yoluxma halı bazar ertəsi, yanvarın 19-da qeydə alınıb. Bundan sonra regional səhiyyə orqanları profilaktik məhdudiyyətlər tətbiq edib. Xəstələrlə təmasda olmuş təxminən 100 nəfər ev şəraitində karantinə göndərilib.

Yeni yoluxanlardan üçü Kalkuttanın şərqində yerləşən tibb müəssisələrində xəstəxanaya yerləşdirilib. Daha əvvəl virus aşkarlanmış digər iki xəstə isə özəl klinikanın reanimasiya şöbəsində müalicə alır. Ştatın səhiyyə departamentinin yüksəkvəzifəli nümayəndəsinin sözlərinə görə, xəstələrdən biri — tibb qardaşı — tədricən sağalma əlamətləri göstərir, lakin digər xəstənin vəziyyəti son dərəcə ağır olaraq qalır. Hər iki xəstə ürək-damar fəsadları olan pasiyentlər üçün nəzərdə tutulmuş reanimasiya şöbəsində müalicə olunur.

Hakimiyyət orqanları daha əvvəl yoluxanlar arasında həkim, tibb bacısı və tibb müəssisəsinin əməkdaşının da olduğunu bildirmişdi.

Qeyd edək ki, Nipah virusu xüsusilə təhlükəli infeksiyalar sırasına daxildir. Virus heyvanlardan insanlara keçə bildiyi kimi, insanlar arasında da yaxın təmas yolu ilə yayıla bilər. Hindistanda virusun əsas təbii mənbəyi yarasalardır. İnsanlarda xəstəlik həm simptomsuz keçə, həm də ağır tənəffüs və digər ciddi fəsadlarla müşayiət oluna bilər.