Hipotiroidizm çox vaxt gec mərhələyə qədər özünü göstərmir, lakin xəstəlik irəlilədikcə səsdə və nitqdə yaranan dəyişikliklər qalxanvari vəzin fəaliyyətində problemin ciddi əlaməti hesab olunur.

Finss.az xəbər verir ki, endokrinoloq Qureevanın sözlərinə görə, tiroid hormonunun kəskin azalması həm fiziki, həm də nevroloji dəyişikliklərə səbəb olur və bunlar xüsusilə üzdə və səsdə özünü göstərir.

Həkim bildirib ki, bəzi insanlarda üz şişkinliyi müşahidə oluna bilər, lakin hər xəstədə rast gəlinmir:

“Görünüşdəki bu dəyişikliklər, səsdəki fərqlər, xəstəliyin sonrakı mərhələlərində xüsusilə nəzərə çarpa bilər. Hipotiroidizm xəstələrində səs xüsusiyyətləri çox müxtəlifdir. Bu vəziyyət dərin səs, kobudluq, azalmış diapazon və səs yorğunluğu kimi nəzərə çarpan dəyişikliklərə səbəb olur”.

Mütəxəssis əlavə edib ki, nitq tərzindəki dəyişikliklər bəzən sinir disfunksiyasının göstəricisi ola bilər.

“Aşağı tiroid hormonu səviyyəsi bəzi bədən funksiyalarını yavaşlatdığı üçün bu, üzün sinir və əzələlərinin stimullaşdırılmasının azalmasına səbəb ola bilər”, – deyə o qeyd edib.

Qureeva qeyd edib ki, tiroid hormonunun çatışmazlığı bədənin bir çox orqanına və proseslərinə birbaşa təsir edir və simptomlar artdıqca daha qabarıq şəkildə özünü büruzə verir.