Finss.az - Yaponiyanın Mie Universiteti Tibb Fakültəsindən olan alimlər, genetik redaktə üsulu ilə Daun sindromunun müalicəsində irəliləyiş əldə ediblər. Onlar, xəstəliyə səbəb olan əlavə xromosomun çıxarılması üzərində uğurlu nəticələr əldə ediblər. Araşdırma, PNAS Nexus elmi jurnalında dərc olunub.

Daun sindromu, 700 yeni doğulmuş körpədən 1-də baş verir və 21-ci xromosomun üçüncü nüsxəsinin olması ilə əlaqələndirilir. Hələ də effektiv müalicəsi tapılmamış bu vəziyyətin diaqnozu asan olsa da, müalicəsi çətindir.

Ryotaro Hashizumenin rəhbərlik etdiyi alimlər, CRISPR-Cas9 texnologiyasından istifadə edərək pluripotent kök hüceyrələri və dəri fibroblastlarından əldə edilən hüceyrə xətlərində əlavə xromosomu çıxarmağa müvəffəq olublar. Tədqiqatçılar, hər iki valideyndən bir xromosomu saxlayaraq, əlavə xromosomu dəqiq şəkildə çıxarıblar. DNT təmir mexanizmlərinin istifadəsi isə xromosom çıxarılmasının səmərəliliyini artırıb.

Bu irəliləyiş, genetik xəstəliklərin müalicəsi üçün vacib addım olsa da, müasir texnologiya hələ də canlı orqanizmlərdə istifadə üçün tam hazırlıqlı deyil. Çünki, texnologiya digər xromosomlara təsadüfi zərər verə bilər və bu da əlavə təkmilləşdirmələr tələb edir.

Klinik tətbiq üçün hələ uzun yol olsa da, alimlər bu tədqiqatın genetik xəstəliklərin müalicəsi sahəsində mühüm bir addım olduğunu və gələcəkdə metodun tibbdə təhlükəsiz istifadə edilə biləcəyinə ümid edirlər.

Zemfira Ms
Finss.az