2024-cü ilin ilk dövründə ən çox satılan telefon markası açıqlanıb. Samsung və Apple arasında rəqabətin qalibi kim oldu?

Fins.az xəbər verir ki, Samsung 2024-cü ildə dünyanın ən çox satılan smartfon istehsalçısı titulunu bərpa etdi. Keçən il birinciliyini Apple-a itirən şirkət bu ilin ilk rübündə yenidən lider olmağı bacarıb. 

Counterpoint Research-in son hesabatlarına görə, Samsung mart ayında 19,69 milyon telefon sataraq, 20 faiz qlobal bazar payını ələ keçirib. Apple isə 17,41 milyon iPhone satışı ilə bazarın 18 faizini təşkil edib. Bu geri dönüş əsasən Galaxy S24 seriyası və Galaxy AI kimi süni intellekt xüsusiyyətləri ilə əlaqələndirilir.

Yanvar ayında satışa çıxarılan Galaxy S24 seriyası telefon zəngləri zamanı real vaxt rejimində dil tərcüməsi və istifadəçilərə Google Axtarış ilə sürətli axtarışlar etməyə imkan verən “Axtarmaq üçün dairə” kimi funksiyaları təklif edir. Bu serianın mart ayının sonuna qədər 6,53 milyon ədəd satıldığı bildirilir.

Samsungun Avropadakı üstünlüyü xüsusilə diqqəti cəlb etdi. Hesabata görə, şirkət Avropada smartfon bazarının 34 faizini ələ keçirib. Samsung ABŞ-da bazar payını yanvarda 20 faizdən martda 36 faizə yüksəldib.

Keçən il Apple ilk dəfə olaraq dünyada ən çox satılan smartfon istehsalçısı oldu. Dünyada 229 milyondan çox iPhone satan şirkət 225 milyon satan Samsung-u geridə qoyub. Bununla belə, texnologiya nəhənginin liderliyi bu il başa çatıb.

Günel Məlikzadə
Fins.az