Twitch-in keçmiş meneceri Emmett Shear işdən çıxarılan süni intellekt şirkəti Open.AI-nin baş direktoru Sem Altmanın yerinə təyin edilib.

Fins.az Bloomberg-ə istinadən xəbər verir ki, şirkətin direktorlar şurası investorların Altmanın vəzifəyə qayıtması üçün təzyiqlərinə məhəl qoymadan yeni təyinatı həyata keçirib.

Məhsuldar süni intellektin aparıcı şirkəti olan OpenAI-nin qurucu CEO-su Sam Altmanın təəccüblü şəkildə işdən çıxarılmasından sonra şirkətin investorları və bəzi rəhbər işçiləri həftə sonu Altmanıgeri gətirmək üçün səylərini davam etdirdilər.

Microsoft və bəzi digər investorlar cümə günü işdən çıxarılan Altmanın baş direktor vəzifəsinə geri qaytarılmasını tələb edirdilər.

Baş direktor vəzifəsinə qayıtmağa açıq olan Altman mövcud idarə heyəti üzvlərinin ləğv edilməsinə çağırırdı. Altmanın yerinə müvəqqəti icraçı direktor təyin olunan Mira Murati də Altmanın geri dönməsini dəstəkləyib.

Altman cümə günü "idarə heyəti ilə ünsiyyətdə səmimi olmadığı" səbəbi ilə işdən çıxarılıb. Altmanın bu hadisədən əvvəl yeni süni intellekt çip təşəbbüsü üçün xüsusilə Yaxın Şərqə milyardlarla dollar sərmayə qoya biləcək fondlarla əlaqə saxladığı bildirilib.

Bu təşəbbüsün süni intellekt sənayesinin hardware tərəfində üstünlük təşkil edən Nvidia-ya birbaşa rəqib olması planlaşdırılırdı. Süni intellekt mövzusunun bu ilki ABŞ səhm rallisində böyük rol oynaması da OpenAI idarəetmə böhranının həllini vacib edir.

Günel Məlikzadə
Fins.az