Pandemiyanın gətirdiyi məhdudiyyətlərdən biri də əksər ölkələrdə ictimai nəqliyyatın ya həftəsonları, ya da müəyyən müddət ərzində tamamilə işləməməsidir. Bu isə avtomobillərə nisbətən daha ucuz və sağlam nəqliyyat vasitəsi olan velosipedlərə tələbatı son 10 ildə görünməmiş dərəcədə artırıb.

Fins.az xəbər verir ki, ilin əvvəlindən 62 milyon ədəddən çox velosiped buraxan qlobal istehsalçılar sürətlə yüksələn sifarişləri tam həcmdə yerinə yetirməkdə çətinlik çəkir. Səbəb ehtiyat hissələrin təchizatında qlobal bazarın 65%-ni əlində saxlayan Yaponiyanın Shimano şirkətinin üzləşdiyi problemlərdir.

Bu il 100 yaşını qeyd edəcək Shimano 40-a yaxın filialı, Çin, Malayziya və Sinqapurdakı ən iri zavodları və  illik 3 milyard dollardan artıq satışları ilə velosipedlər üçün təkər, əyləc, çarx və digər mexanizmlərin təchizatında dünya lideridir. Son bir ildə qlobal tələbatın sürətlə artması nəticəsində şirkət istehsal həcmini və işçi sayını maksimum artırsa da, istehsalçıları lazımi ehtiyat hissələri ilə təchiz etməkdə çətinlik çəkir. Dünyanın ən iri velosiped istehsalçılarından ABŞ-ın Trek, Tayvanın Giant və Merida, İtaliyanın Cicli Pinarello, Davide Campagnolo şirkətləri bu səbəbdən bəzən sifarişlərin 300 günə qədər ləngidiyini bildirirlər.

Tour de France beynəlxalq velosiped yarışının üçqat qalibi Greg LeMondun adı ilə əlaqədar yaradılan yeni velosiped istehsalçısı LeMond isə Shimanonun təchizatı 80% kəsməsi səbəbindən yeni modelini 4 aydır ki buraxa bilmir. Ekspertlər tələbatın gələn ilin yayına kimi yüksək həddə qalacağını və yalnız pandemiyanın təsirləri böyük dərəcədə ötdükdən sonra səngiyəcəyini proqnozlaşdırır.

© Marja