Yer kürəsində temperaturun artması planetdə ciddi iqlim dəyişikliklərinə yol açacaq. Bu barədə Nature Communications jurnalında məlumat verilib.

Alimlərin araşdırmalarına görə, qlobal temperaturun artması Atlantik axını, Amazon tropik meşələri və ya Arktika və Antarktika buzlaqlarında domino effekti yaradaraq planetdə iqlim inkişafında dönüş nöqtəsi gətirə bilər.

"Bizim araşdırmamız göstərir ki, cari iqlim siyasətinə 2100-cü ilədək riayət edilməsi, hətta uzunmüddətli temperatur 2300-cü ilədək 1,5 dərəcə Selsiyə qayıtsa belə, geri dönüşü olmayan yüksək risklərə səbəb ola bilər," - deyə dərcdə qeyd olunur.

Finss.az xəbər verir ki, cari iqlim tendensiyaları davam edərsə, bu əsrdə dönüş nöqtəsi riskinin yaranma ehtimalı 45% təşkil edir. Bu riskin qarşısını almaq üçün istixana qazlarının sıfır emissiya səviyyəsini qorumaq zəruridir.

Martın 19-da "Bizim Fond" adlı təbiəti qoruma və sosial əhəmiyyətli layihələr dəstəkləyən fondun direktoru Olqa Lakustova, son zamanlarda Yer kürəsində iqlim dəyişikliyinin daha çox əlamətlərinin müşahidə olunduğunu və bunun gələcəkdə müxtəlif fəlakətlərə səbəb ola biləcəyini bildirdi. O, son 100 ildəki meteoroloji müşahidələrin dinamikasına nəzər salsaq, Yer kürəsində temperaturun orta hesabla bir dərəcə Selsiyə qədər artdığını vurğuladı.

Lakustova həmçinin iqlim dəyişikliyini sürətləndirən səbəblər arasında enerji istehsalı üçün fosil yanacaq istifadəsini qeyd etdi və bu ehtiyacın hər il daha da artdığını bildirdi.