Birləşmiş Millətlər Təşkilatının Ərzaq və Kənd Təsərrüfatı Təşkilatı (FAO) - Türkiyə Tərəfdaşlıq Proqramı (FTPP II) çərçivəsində həyata keçiriləcək “Torpaqların tərk edilməsi problemini həll etmək və torpaqların konsolidasiyası prosedurlarını yaxşılaşdırmaq üçün kənd təsərrüfatı torpaq bazarının inkişafının gücləndirilməsi – GCP/SEC/022/TUR” layihəsi çərçivəsində görüş keçirilib.
Fins.az xəbər verir ki, tədbirdə Kənd Təsərrüfatı Nazirliyi, İqtisadiyyat Nazirliyi, Dövlət Statistika Komitəsi, Qaçqınların və Məcburi Köçkünlərin İşləri üzrə Dövlət Komitəsi, eləcə də Dünya Bankının nümayəndələri, yerli və xarici ekspertlər iştirak edib.
Tədbiri giriş sözü ilə açan kənd təsərrüfatı nazirinin müavini İlhamə Qədimova həyata keçiriləcək layihənin ölkə üzrə əhəmiyyətindən danışıb, torpaqların istifadəsiz qalması ilə bağlı mövcud çətinliklərə toxunub. Nazir müavini qeyd edib ki, bütün dünyada kənd təsərrüfatı torpaqlarının istifadəsiz qalması ətraf mühitə və cəmiyyətin rifahına təsir etməklə qlobal torpaq örtüyünün dəyişməsinə gətirib çıxarır. Bu da öz növbəsində əkinə yararlı torpaq sahələrinin deqradasiyası, təyinatına uyğun istifadə olunmaması, ərzaq təminatının pisləşməsi, iqtisadi imkanların itirilməsi, ekoloji vəziyyətin pisləşməsi ilə nəticələnir.
Qeyd edək ki, torpaqların istifadəsiz qalmasının qarşısının alınması məqsədilə Azərbaycan hökuməti BMT-nin Ərzaq və Kənd Təsərrüfatı Təşkilatı (FAO) ilə birlikdə 2016-2019-cu illərdə texniki əməkdaşlıq proqramı çərçivəsində “Torpaqların Konsolidasiyası üzrə Milli Strategiyanın və Torpaqların Konsolidasiyası üzrə Pilot Layihənin hazırlanmasına dəstək” layihəsi (TCP/AZE/3601) həyata keçirib. Nəticədə “Torpaqların Konsolidasiyası üzrə Milli Strategiya” layihəsi, “Kənd Təsərrüfatı Torpaqlarının Konsolidasiyası haqqında” qanun layihəsi və “Torpaqların Konsolidasiyası üzrə Dövlət Proqramı” layihəsi hazırlanıb. Salyan rayonunun Şorsulu kəndində torpaqların konsolidasiyası üzrə pilot layihə icra olunub.
Tədbirdə çıxış edən Azərbaycanda FAO-nun Tərəfdaşlıq və Əlaqələndirmə Ofisinin rəhbəri Nasar Hayat layihənin məqsəd və vəzifələri, torpaq sahələrinin konsolidasiyasının əhəmiyyəti, aktuallığı, qabaqcıl ölkələrin bu sahədə təcrübəsi barədə ətraflı məlumat verib. FAO-nun torpaq mülkiyyəti üzrə məsləhətçisi “Torpaqların Konsolidasiyası üzrə Milli Strategiyanın və Torpaqların Konsolidasiyası üzrə Pilot Layihənin hazırlanmasına dəstək” layihəsi barədə təqdimat edib, əldə olunan nəticələrlə bağlı görüş iştirakçılarını məlumatlandırıb, yeni layihə çərçivəsində görüləcək işlərə toxunub.
Tədbirdə mövzu ətrafında fikir mübadiləsi aparılıb, iştirakçıları maraqlandıran suallar cavablandırılıb, tədbir iştirakçılarının rəy və təklifləri dinlənilib.
