Finss.az - ABŞ prezidenti Donald Tramp çərşənbə günü ölkəsinin xarici ticarət tərəfdaşlarına qarşı "güzgü rüsumları" tətbiq edəcəyini açıqlayıb.

Ağ Evdə çıxışı zamanı Tramp bildirib ki, ABŞ digər ölkələrin tətbiq etdiyi rüsumlara eyni qaydada cavab verəcək:
"Bunlar güzgü rüsumlarıdır. Əgər onların bizə qarşı rüsumları varsa, biz də onlara qarşı rüsum tətbiq edirik."

O, bu qərarı ABŞ-ın "iqtisadi müstəqilliyinin bəyanatı" adlandırıb və yeni rüsumların tamamilə simmetrik olmayacağını qeyd edib. Prezident təqdim etdiyi cədvəldə fərqli ölkələrdə ABŞ məhsullarına tətbiq olunan rüsumlarla ABŞ-ın cavab tədbirlərini müqayisə edib.

Məlumata görə, Çində ABŞ məhsullarına tətbiq olunan rüsumlar orta hesabla 67%, ABŞ-ın cavab rüsumları isə 34% olacaq. Avropa İttifaqında bu göstərici 39%, ABŞ-ın cavab rüsumları isə 20% təşkil edəcək. Yaponiyanın tətbiq etdiyi rüsumlar 46%, ABŞ-ın cavab tədbirləri isə 24% olacaq. Hindistanın ABŞ məhsullarına tətbiq etdiyi rüsumlar 52%, ABŞ-ın cavab tədbirləri isə 26% səviyyəsində müəyyən edilib.

Tramp əlavə edib ki, minimal baza rüsum 10% səviyyəsində müəyyən edilib. O, bu yanaşmanı "yumşaq cavab rüsumları" adlandıraraq, ABŞ-da istehsalın artırılmasının vacibliyini vurğulayıb:
"Əgər rüsumların 0% olmasını istəyirsinizsə, o zaman məhsullarınızı burada, ABŞ-da istehsal edin."

Yeni rüsum qərarı ABŞ-ın ticarət siyasətində mühüm dəyişiklik hesab olunur və beynəlxalq ticarət münasibətlərinə təsir edə bilər.