Bu il Azərbaycanda 48 mlrd. kubmetr ətrafında təbii qaz hasil olunacaq.

Fins.az-ın verdiyi xəbərə görə, bunu Bakı Enerji Həftəsi çərçivəsində keçirilən Bakı Enerji Forumunda çıxışı zamanı energetika nazirinin müavini Kamal Abbasov bildirib.

Onun sözlərinə görə, cari ildə ölkədə 30 mln. ton ətrafında neftin hasil olunması gözlənilir və ötən il Azərbaycanda 30 mln. tona yaxın neft hasil edilib, bunun da 25 mln. tonu ixraca yönəldilib:

"Ötən il Azərbaycanda 48 mlrd. kubmetr civarında qaz hasil olunub ki, bunu 20 mlrd. kubmetrdən çoxu ixrac edilib. Ötən il ixrac olunan qazın 12 mlrd. kubmetri Avropaya, 9,5 mlrd. kubmetri isə Türkiyəyə nəql edilib.

2025-ci il "Azəri-Çıraq-Günəşli" yataqları blokunda dərin qaz laylarının işlənilməsi çərçivəsində hasilatın başlanılacağı gözlənilir, bu da ölkədə "mavi" yanacaq hasilatının daha da artmasına şərait yaradacaq".

Fuad Mədətov
Fins.az