Ötən ilə nisbətən bu il tədricən özünə gəlməyə başlayan qlobal iqtisadiyyatın ən çox ehtiyac duyduğu yanacaq növləri daş kömür və qaz olacaqdır.

Fins,az xəbər verir ki, Beynəlxalq Enerji Agentliyi bugünkü yeni proqnoz açıqlamasında xüsusən Asiyada daş kömürdən istifadənin əvvəlki səviyyəyə qayıdacağını, nəticədə atmosferə buraxılan karbon emissiyalarının 2010-cu ildən bəri ən çox - illik 1,5 milyard ton artaraq, 33 milyard tona yüksələcəyini bildirib. Çində elektrik enerjisi istehsalının həcminin artırılması əsas yanacaq növü kimi kömürdən istifadənin və nəticədə zərərli qaz emissiyalarının artmasında ən mühüm təkanverici amil olacaq.

Ötən il koronavirus pandemiyası səbəbindən tətbiq edilən məhdudiyyətlər karbon emissiyalarının həcmini ilin birinci yarısında kəskin - 80%-ə qədər azaltmışdı. Sonradan iqtisadi sahələrin müəyyən dərəcədə bərpası nəticəsində artan emissiyalar yekunda 2019-cu illə müqayisədə illik 6% azalmanı rəsmiləşdirmişdi. Beynəlxalq Enerji Agentliyi cari ildə enerji tələbatının 2020-ci ildəki 4% azalma ilə müqayisədə 4,6%, artacağını, kömürə tələbatın 4,5% artaraq, 2014-cü ilin səviyyəsinə yüksələcəyini, bu artımların Asiya (xüsusən Çin iqtisadiyyatı), ABŞ və Avropa bazarları hesabına baş verəcəyini proqnozlaşdırır.

“Bu qorxunc xəbərdarlığı etməliyik ki, COVID-19 pandemiyasının nəticələrinin aradan qaldırılması və qlobal bərpa dayanıqlı iqlim hədəflərimizlə uyğunluq təşkil etmir” – Agentliyin direktoru Fatih Birol bildirib. O, bu həftə ABŞ-ın ev sahibliyi edəcəyi qlobal iqlim sammitinin iştirakçılarını “daha aydın və təxirəsalınmaz tədbirlər görməyə” çağırıb.

BMT-nin Baş katibi Antonio Quterreş isə ötən günkü açıqlamasında əsas prioritetin heç bir yeni kömür emalı zavodunun inşa edilməməsi və daş kömürdən istifadənin 2040-cı ilə qədər qlobal miqyasda tədricən sıfıra endirilməsi olduğunu bildirib. Ümümdünya Meteorologiya Təşkilatının rəhbəri Petteri Taalas qlobal temperaturun növbəti beş ildə ümumilikdə 1.5 °C artacağı ehtimalının yüksək olduğuna diqqət çəkib.