"OPEC+" (OPEC və təşkilata daxil olmayan ölkələri əhatə edən neft istehsalının azaltması üzrə təşəbbüs) ölkələri sentyabr ayında neft hasilatının azaldılmasına dair öhdəliklərini 102% icra edib. Son beş ayda ortalama icra səviyyəsi 100% olub.

Fins.az xəbər verir ki, bunu Rusiyanın Energetika Naziri Aleksandr Novak "OPEC+" ölkələrinin nazirlərinin monitorinq komitəsinin iclasından (JMMC) sonra deyib.

Onun sözlərinə görə, II rübdə bazarda tələbatın əhəmiyyətli azalmasından sonra sözügedən razılaşma üzrə sazişin icra səviyyəsinin olduqca yüksək göstəriciləri bazarın sabitləşməsinə çox müsbət təsir göstərib.

İclasdan sonrakı bildirişdə qeyd edildiyi kimi, razılaşması üzrə sazişin 102% səviyyədə yerinə yetirilməsi 2020-ci ilin may ayından bəri ən yüksək göstəricidir. Əlavə olaraq, ölkələr 2020-ci ilin sentyabr ayında azalma çatışmazlığını gündə ümumilikdə 249 min barel əlavə azalma ilə kompensasiya ediblər.

Qeyd edək ki, Beynəlxalq Enerji Agentliyinin (IEA) oktyabr hesabatında "OPEC+" razılaşması üzrə sazişin icra nisbəti 103% təşkil edib.

Xatırladaq ki, "OPEC+" üzrə gündəlik neft hasilatının 2018-ci ilin oktyabr ayı səviyyəsindən 7,7 mln. barel ixtisarı prosesi çərçivəsində Azərbaycan sentyabrda sutkada xam neft hasilatını 133 min barel azaldıb. Bununla da Azərbaycan sentyabrda "OPEC+" üzrə öhdəliyini artıqlaması ilə yerinə yetirib.

"Əməkdaşlıq Bəyannaməsi"nə əsasən, 2018-ci ilin oktyabr ayında gündəlik xam neft hasilatı 718 min barel olan Azərbaycan cari ilin avqust-dekabr aylarında xam neft istehsalını sutkada 131 min barel azaltmaqla 587 min barel həcmində saxlamalıdır. Öhdəliklərin icrası məqsədilə gündəlik xam neft hasilatı 2018-ci ilin oktyabr ayındakı səviyyələrdən, AÇG-də 567 min bareldən azaldılaraq 461 min bareldə, SOCAR ("Azneft" İB, BM və ƏŞ) üzrə isə 151 min bareldən ixtisar edilərək 126 min barel həcmində saxlanılmalıdır.