SOCAR-ın Türkiyədəki “Petkim” neft-kimya kompleksi 80 ölkəyə məhsul ixrac edir.

AZƏRTAC Türkiyə KİV-lərə istinadla xəbər verir ki, bu barədə “Petkim PetroKimya Holding A.Ş.”nin icraçı direktoru Anar Məmmədov deyib.

O bildirib ki, “Petkim” keçən il 622 milyon dollarlıq ixrac həyata keçirib.

Qeyd edək ki, Egey İxracatçılar Birliyi “Petkim”i “Kimya sektorunun ən çox ixrac həyata keçirən şirkəti” və “Egey bölgəsinin ən çox ixrac reallaşdıran şirkəti” nominasiyalarında mükafatlandırıb. “Petkim” ötənilki ixrac göstəricisi ilə Egey dənizi bölgəsinin həm kimya sənayesində, həm də bütün sektorlar üzrə ən çox ixrac həyata keçirən şirkəti olub.

Xatırladaq ki, SOCAR 2008-ci ildə “Petkim” şirkətinin səhmlərinin 51 faizini 2,04 milyard ABŞ dollarına alıb. Daha sonra Özəlləşdirmə İdarəsinə məxsus olan 10 faizlik payı alınıb və sonra o satılıb. O dövrdə “Petkim”in dövriyyəsi 2,1 milyard türk lirəsi olub. Bu illər ərzində “Petkim”in yaxşılaşdırılması üçün 760 milyon dollar investisiya qoyulub. Şirkət üçün ciddi bir sərmayə proqramı var və bu investisiya 2009-2012-ci illər arasında tədricən həyata keçirilib. Hazırda “Petkim” Türkiyənin ən böyük şirkətlərindən biridir. “Petkim” Türkiyənin neft-kimya məhsuluna olan tələbatının 20 faizini ödəyir.

SOCAR 2008-ci ilin mayından etibarən Türkiyədəki fəaliyyətini “SOCAR Turkey Enerji A.Ş.” (STEAŞ) adı ilə davam etdirir. Hazırda STEAŞ “Petkim”də təxminən 51 faizlik paya sahibdir.

“Petkim” 15 əsas və 6 köməkçi müəssisəsi ilə illik 3,6 milyon ton neft-kimya məhsulu istehsal edir.