2025-ci ilin fevral ayında “Qala Həyat” Sığorta Şirkəti Açıq Səhmdar Cəmiyyətinin maliyyə göstəriciləri kəskin dəyişikliklər nümayiş etdirib.

Finss.az bu barədə Azərbaycan Mərkəzi Bankının (AMB) yayımladığı məlumata əsasən xəbər verir ki, şirkətin topladığı sığorta haqları yanvar ayında 1 396 min manat olduğu halda, fevralda bu rəqəm 3 519 min manata yüksəlib. Bu isə 152%-lik artım deməkdir və şirkətin gəlirlərində nəzərəçarpacaq yüksəlişin olduğunu göstərir. Lakin bu artımın davamlı olub-olmayacağı sual altındadır.

Digər tərəfdən, sığorta ödənişlərində ciddi azalma qeydə alınıb. Yanvar ayında 116 min manat sığorta ödənişi həyata keçirən şirkət, fevral ayında cəmi 33 min manat ödəyib. 71,70%-lik kəskin azalma müştərilər üçün mənfi siqnal ola bilər və şirkətin ödəniş siyasətində dəyişikliklər etdiyini göstərə bilər.

Sığorta haqlarında kəskin artım və ödənişlərdə bu qədər böyük azalma, müştərilərin etibarına və bazarda şirkətin nüfuzuna təsir edə bilər. Bu göstəricilər, şirkətin müştərilər qarşısında öhdəliklərini yerinə yetirmə qabiliyyəti ilə bağlı müəyyən suallar doğura bilər.

Fuad Mədətov
Finss.az