Ağ Ev ABŞ prezidenti Co Bayden, Neft İxrac Edən Ölkələr Təşkilatı (OPEC) və bəzi qeyri-OPEC istehsalçı ölkələrindən ibarət OPEC+ qrupunun noyabr ayından etibarən gündəlik neft hasilatını 2 milyon barel azaltmaq qərarına qəzəblənib.
"Fins.az" xəbər verir ki, ABŞ Milli Təhlükəsizlik müşaviri Jake Sullivan və Milli İqtisadiyyat Şurasının direktoru Brian Deese birgə yazılı açıqlamada, "Ağ Ev və ABŞ prezidenti Co Bayden, qlobal iqtisadiyyat Putinin Ukraynaya hücumunun mənfi təsirləri ilə mübarizə apararkən, OPEC+ qrupunun hasilatı azaltmaq barədə yersiz qərarından məyus oldu", - bildirilir.
Açıqlamada, sözügedən qərarın enerji qiymətlərinin artması səbəbindən onsuz da çətinlik yaşayan aşağı və orta gəlirli ölkələrə mənfi təsir göstərəcəyi qeyd edilib.
Açıqlamada ABŞ-ın ölkədə artan benzin qiymətlərini aşağı salmaq üçün əlindən gələni etdiyini vurğulanaraq, “Prezident Baydenin göstərişi ilə Energetika Nazirliyi Strateji Neft Ehtiyatından bazara gələn ay daha 10 milyon barel neft çıxaracaq", - məlumatı verilib.
Baydenin Amerika xalqını qorumaq və enerji təhlükəsizliyini artırmaq üçün neftin strateji ehtiyatlardan bazara çıxarılması əmrini davam etdirəcəyinə diqqət çəkərək, Energetika Nazirliyinə yerli neft hasilatını artırmaq üçün başqa yollar axtarmağı da tapşırdığı bildirilib.
"Həmçinin Prezident Bayden topdan və pərakəndə neft satışı arasındakı tarixi uçurumu aradan qaldırmaq üçün Amerika enerji şirkətlərini neft qiymətlərini aşağı salmağa dəvət edir", - açıqlamada bildirilir.
Açıqlamada, OPEC+ qrupunun bugünkü qərarından sonra Bayden administrasiyasının Konqres ilə OPEC-in enerji qiymətlərinə təsirinin azaldılması məsələsini müzakirə edəcəyi bildirilib.
OPEC+ qrupunun neft qərarı
OPEC+ qrupunun energetika və neft nazirləri dünən Vyanada keçirilən iclasda noyabr ayından gündəlik neft hasilatını 2 milyon barel azaltmaq qərarına gəliblər. Qlobal neft təklifinin bu səviyyədə azalmasının bazarda qıtlığı artıracağı bildirilir.
Mütəxəssislər bildirirlər ki, Çində Covid-19 nəzarət altına alındıqdan və tələbat bərpa olunduqca bazarda qıtlıq daha da pisləşə bilər.
ABŞ-ın strateji ehtiyatında xam neft 1984-cü ildən bəri ən aşağı səviyyədədir
Mart ayında ABŞ prezidenti Co Bayden ölkənin strateji neft ehtiyatlarından 6 ay ərzində gündə 1 milyon barel, ümumilikdə 180 milyon bareldən çox neftin buraxılmasına icazə verib.
Ağ Ev iyulun sonunda elan edib ki, ölkə daxilində benzin qiymətlərinin aşağı düşməsinə kömək etmək üçün strateji neft ehtiyatından əlavə 20 milyon barel neft satacaq.
ABŞ administrasiyası sentyabr ayında strateji neft ehtiyatından 10 milyon barrelə qədər neft satacağını açıqlamışdı.
Bu satışlar ilə ABŞ-ın strateji ehtiyatında olan xam neftin nisbəti 1984-cü ildən bəri ən aşağı səviyyəyə düşüb.