Azərbaycanda qablaşdırma məhsullarının topdan və pərakəndə satışı üzrə aparıcı şirkətlərdən biri olan AMEA-nın Yüksək Texnologiyalar Parkının (YT Park) rezidenti olan “Bakı Polimer İstehsalat” MMC -in istehsal etdiyi məhsulların artıq Rusiya bazarına ixracına başlanılıb.

Fins.az xəbər verir ki,qısa müddətdir fəaliyyət göstərməsinə baxmayaraq artıq böyük uğurlara imza atan “Bakı Polimer İstehsalat” MMC yaxın zamanda ixrac imkanlarını genişləndirərək digər ölkələrə də məhsulların satışını nəzərdə tutur.  

Xatırladaq ki, şirkətin məhsullarını istehsal etdiyi avadanlıq ən son texnologiyalar əsasında hazırlanıb və 8 mikron qalınlığa qədər 5 qat streç film istehsalına imkan verir. Bu isə daha kiçik qalınlıqda ağırçəkili yüklərin qablaşdırılmasını mümkün edir.

Qeyd edək ki, İqtisadi İslahatların Təhlili və Kommunikasiya Mərkəzinin “Bir pəncərə” İxraca Dəstək Mərkəzi tərəfindən “Bakı Polimer İstehsalat” MMC-yə xarici biznes tərəfdaşları ilə sənədlərin, o cümlədən müqavilələrin elektron formada tərtibi və imzalanması, habelə real vaxt rejimində transsərhəd elektron xidmətlərin həyata keçirilməsi istiqamətində dəstək göstərilib.