Hindistandan olan iki qardaş təyyarənin eniş şassisində gizlənərək Böyük Britaniyaya daxil olmağa cəhd ediblər. Onlardan biri təxminən -60°C temperaturda 12 kilometrdən çox yüksəklikdə on saatlıq uçuşdan sağ çıxıb, digəri isə eniş zamanı dünyasını dəyişib.


Sfera.az bildirir ki, separatçı təşkilatla əlaqədə şübhəli bilinən qardaşlar Pardeep və Vijay Saini Nyu-Dehlidən Londona uçan “British Airways”ə məxsus Boeing 747 təyyarəsinin eniş şassisinə daxil olublar. Uçuş zamanı təyyarə təxminən 6,400 kilometr məsafə qət edərək, təxminən 12,200 metr (40,000 fut) yüksəkliyə qalxıb.
 

22 yaşlı Pardeep sağ qalıb, kiçik qardaşı 18 yaşlı Vijay isə təyyarə Hitrou hava limanına yaxınlaşarkən eniş şassisindən yıxılıb. O, yıxılaraq dünyasını dəyişib.
 

Pardeep ekstremal şəraitə, o cümlədən -60°C (-90°F) qədər aşağı temperatur və oksigen çatışmazlığına dözüb. Enişdən sonra hava limanının əməkdaşları onun vəziyyətinin ağır olduğunu aşkar ediblər. O, tibb müəssisəsinə, sonra isə təcridxanaya aparılıb, daha sonra sərbəst buraxılıb.
 

"Altı il depressiyada idim. İkimiz də ölsəydik, bir hekayə olardı, ya ikimiz də sağ qalsaydıq, başqa hekayə olardı. Amma mən kiçik qardaşımı itirdim. O, mənim üçün dost kimi idi. Bir yerdə böyümüşük"- deyə Pardeep deyib.
 

ABŞ Federal Aviasiya Administrasiyasının məlumatına görə, 1947-ci ildən 2015-ci ilə qədər təyyarələrin eniş aparatlarının bölmələrinə daxil olmaq üçün ən azı 113 cəhd qeydə alınıb. 86 nəfər əsasən hipotermiya, oksigen çatışmazlığı və ya uçuş və eniş zamanı yıxılma nəticəsində həlak olub.
 

Xatırladaq ki, 2023-cü ilin sentyabrında Dehlinin İndira Qandi Beynəlxalq Hava Limanında işçilər Kabildən gəlmiş Əfqanıstandan olan 13 yaşlı yeniyetməni təyyarənin şassisi bölməsində gizləndiyini aşkar ediblər. O, bunu maraq ucbatından etdiyini izah edib. Oxşar hadisələr dəfələrlə ölümlə nəticələnib.

Aysel