Azərbaycanın aparıcı korporativ maliyyə institutu PAŞA Bank və Deloitte Azərbaycanın əməkdaşlığı ilə həyata keçirilən “Best Managed Companies Azerbaijan 2026” biznes müsabiqəsi rəsmi olaraq elan olunub. Layihənin növbəti mərhələsinin reallaşdırılması məqsədilə tərəflər bu il də əməkdaşlıq müqaviləsini imzalayıblar.
Təqdimat mərasimi çərçivəsində keçirilən rəsmi tədbirdə layihənin əhəmiyyəti, tərəfdaşların ortaq səyləri və proqramın bu il ölkəmizdə 5 illik yubileyini qeyd etməsi xüsusi vurğulanıb.
Bu nüfuzlu biznes müsabiqəsinin əsas məqsədi Azərbaycanın aparıcı özəl şirkətlərini tanıtmaq və mükəmməl idarəetmə təcrübələrinin tətbiqini təşviq etməkdir. “Best Managed Companies” proqramı Deloitte Private tərəfindən hazırlanmış və özəl sektora yönəlmiş qabaqcıl beynəlxalq layihələrdən biridir.
Proqram Azərbaycanda Deloitte Azərbaycan və PAŞA Bank tərəfindən sponsorlaşdırılır, Azərbaycan Biznes İnkişaf Fondu, ADA Universiteti, AMCHAM Azerbaijan və İctimai Televiziya və Radio Yayımları Şirkəti isə tərəfdaş qismində iştirak edirlər.
Cavid Quliyev, PAŞA Bankın İdarə Heyətinin sədri:
“Best Managed Companies” proqramı artıq ölkəmizdə 5-ci ildir ki, uğurla həyata keçirilir. Biz PAŞA Bank olaraq, bu təşəbbüsün Azərbaycanın biznes mühitinin inkişafına verdiyi real töhfədən böyük qürur duyuruq.
Müsabiqə şirkətlərə beynəlxalq standartlara uyğun mükəmməl idarəetmə sistemləri qurmaq, şəffaf və effektiv biznes modelləri formalaşdırmaq üçün unikal imkan yaradır. Əminik ki, bu proqram ölkə iqtisadiyyatının sağlam və dayanıqlı inkişafına dəstək göstərməyə davam edəcək.”
Nuran Kərimov, Deloitte Azərbaycanın İdarəedici Partnyoru:
“Best Managed Companies” layihəsi artıq Azərbaycanda beşinci ilini qeyd edir. Bu təşəbbüs ölkəmizdə biznesin inkişafına, şəffaf idarəetmənin və davamlı böyümənin təşviqinə mühüm töhfə verib. Proqram sayəsində yerli şirkətlər beynəlxalq standartlara uyğun idarəetmə modellərini tətbiq edir və bizneslərini növbəti səviyyəyə daşıyırlar. Biz Deloitte Azərbaycan komandası olaraq “Best Managed Companies” layihəsinin Azərbaycanda sahibkarlığın inkişafına verdiyi töhfədən böyük qürur duyuruq.”
“Best Managed Companies” mükafat proqramı ilk dəfə 1993-cü ildə Kanadada təsis edilib və bu günə qədər ölkənin ən nüfuzlu biznes mükafat proqramlarından biri kimi tanınır. Layihə hazırda 46 ölkədə, o cümlədən Çin, ABŞ, Cənub-Şərqi Asiya, Niderland, Belçika, Almaniya, Danimarka, Çexiya, İtaliya, İsveç, Norveç, Türkiyə, Meksika və Çilidə uğurla həyata keçirilir.
Azərbaycanda isə proqram 2021-ci ildən etibarən keçirilir. İndiyədək 50-yə yaxın şirkət iştirak edib və 11 şirkət “Best Managed Companies Azerbaijan” titulu ilə təltif olunub. Qaliblər arasında Araz Supermarketlər şəbəkəsi, AVRORA Qrup, Azerconnect Group, Bridge Group of Companies, Embawood, NORM Sement (iki dəfə qalib), SƏBA, OBA Market, Veysəloğlu Şirkətlər Qrupu (iki il ardıcıl qalib), METAK (dörd il ardıcıl qalib və Qızıl Mükafat laureatı) və Azərsun Holdinq yer alır.
“Best Managed Companies Azerbaijan 2026” müsabiqəsində iştirak üçün müraciətlər 23 oktyabr 2025-ci il tarixindən etibarən qəbul olunur. Müraciət üçün linkə keçid edin.
Bu müsabiqə haqqında daha ətraflı məlumat üçün sayta keçid edin.
