Azərbaycanda sığorta bazarının inkişafı istiqamətində bir sıra qanunvericilik dəyişiklikləri və islahatlar nəzərdə tutulsa da, bu sahənin dayanıqlı inkişafı üçün yalnız hüquqi və inzibati addımlar kifayət etmir. Sığorta sahəsində ictimai maarifləndirmənin gücləndirilməsi, media qurumlarının və xəbər portallarının daha fəal iştirakı vacibdir.

Bu fikirləri Finss.aza açıqlamasında sığorta eksperti Emil Ağabağırov səsləndirib.

Ekspertin sözlərinə görə, xüsusilə icbari sığorta növlərinin mahiyyəti və gündəlik həyatda oynadığı rol ictimaiyyətə daha geniş və sadə dillə izah edilməlidir:

“Bu baxımdan, icbari sığorta növlərini əhatə edən maarifləndirici reklam çarxlarının yayımlanması üçün media qurumlarına müəyyən dövlət dəstəyi və güzəştlər təqdim olunmalıdır”.

E.Ağabağırov qeyd edib ki, son dövrlərdə baş verən fövqəladə hallar – yanğınlar, yol-nəqliyyat qəzaları və digər hadisələr – cəmiyyətdə sığortaya olan tələbatı və bu sahənin əhəmiyyətini daha da artırır:

“Təbii fəlakətlər nadir hallarda baş versə də, yol-nəqliyyat hadisələri gündəlik həyatın ayrılmaz hissəsinə çevrilib. Məsələn, təkcə bir sığorta şirkətində gün ərzində 100-ə yaxın hadisə qeydə alınırsa, ümumilikdə bu, gündəlik 600-700 hadisəyə bərabərdir”.

Ekspertin fikrincə, bu cür statistik məlumatların media vasitəsilə ictimaiyyətlə paylaşılması sığorta mədəniyyətinin formalaşmasına mühüm töhfə verə bilər:

“Televiziya kanallarında icbari sığortanı təbliğ edən reklam çarxlarına güzəştli efir vaxtı ayrılması, heç olmasa ayda bir dəfə pulsuz yayımlanması təşviq olunmalıdır. Bu təşəbbüs vətəndaşların sığorta anlayışına olan münasibətini müsbətə doğru dəyişə bilər”.

Sonda Emil Ağabağırov vurğulayıb ki, sığorta bazarının sağlam inkişafı üçün dövlət qurumları ilə yanaşı media və ictimaiyyətin də aktiv rolu və əməkdaşlığı zəruridir.

Fuad Mədətov
Finss.az