Doğrudur, bütün cəmiyyətlərdə sığorta vərdişlərini formalaşdıran əsas mexanizm məhz icbari sığortalar olur. Lakin növbəti etapda könüllü sığortalar üzrə satışların intensivləşməsi həmin cəmiyyətlərdə sığorta vərdişlərinin tədricən formalaşmaqda olduğunu göstərir. Sevinc hissi ilə qeyd edə bilərəm ki, bu gün ölkəmizin sığorta bazarında könüllü sığorta sinfi satış göstəricilərinə görə icbari sığortaları əhəmiyyətli dərəcədə üstələyir.

Bunu Finss.az-a açıqlamasında Azərbaycan Sığortaçılar Assosiasiyasının (ASA) icraçı direktoru Elmar Mirsalayev deyib.

Onun sözlərinə görə, 2024-cü ilin yekun nəticələrinə diqqət yetirsək görərik ki, hesabat müddəti ərzində ümumi yığımlarda könüllü sığortaların payı 2023-cü illə müqayisədə 2% artaraq 75% təşkil edib. Buradan da aydın görünür ki, ölkəmizdə sığorta vərdişləri könüllü sığortalar əsasında sistemli şəkildə formalaşır.

E.Mirsalayev onu da qeyd edib ki, hazırda yerli sığorta bazarımızda aktiv olan könüllü sığorta növləri arasında “Həyatın yaşam sığortası”, “Könüllü tibbi sığorta”, “Kasko”, “Əmlakın yanğından və digər risklərdən sığortası” və “Xaricə səfər edən vətəndaşların sığortası” kimi sığorta növlərinin adlarını sadalaya bilərəm.

Fuad Mədətov
Finss.az