“SOCAR Türkiye”nin törəmə şirkəti olan “SOCAR Fiber” Trans-Anadolu Qaz Boru Kəməri (TANAP) boyunca enerji və məlumat axınları üçün strateji körpü rolunu gücləndirir.
Finss.az “SOCAR Türkiye”nin məlumatına əsasən xəbər verir ki, rəqəmsal dünyada saniyələr ərzində baş verən məlumat axınının sabit və etibarlı olması üçün güclü infrastruktur əsas şərtdir. Yüksək sürətli internetə tələbatın artması, aşağı gecikmə və təhlükəsizliklə bağlı tələblərin yüksəlməsi fiber-optik infrastrukturu müasir kommunikasiya şəbəkələrinin əvəzolunmaz elementinə çevirib.
Qeyd olunur ki, fasiləsiz bağlantı, səmərəlilik və təhlükəsizlik təkcə fərdi istifadəçilər üçün deyil, həm də maliyyə, səhiyyə, təhsil, energetika və logistika kimi strateji sahələr üçün mühüm əhəmiyyət daşıyır. Bu baxımdan infrastruktur yatırımları yalnız texnoloji deyil, eyni zamanda iqtisadi və sosial inkişafın əsasını formalaşdırır.
Məlumata görə, Türkiyənin şərqindən qərbinə uzanan 1 850 kilometrlik “SOCAR Fiber” marşrutu bu istiqamətdə həyata keçirilən ən mühüm investisiyalardan biridir. TANAP qaz kəməri boyunca çəkilmiş fiber xətt təkcə enerji deyil, həm də məlumat axınları üçün strateji körpü funksiyasını yerinə yetirir.
Marşrut Bursa, Eskişehir, Ankara, Sivas, Ərzurum və Qars kimi şəhərlərin yaxınlığından keçir və hər iki tərəfdən ikiqat kabellərlə qurulub. Bu isə rezervləmə imkanlarını genişləndirərək yüksək etibarlılığı və fasiləsiz internet bağlantısını təmin edir.
“SOCAR Fiber” infrastrukturu şəhərlərarası əlaqəni gücləndirməklə yanaşı, beynəlxalq bağlantıların şaxələndirilməsinə də töhfə verir. Yunanıstan və Gürcüstan sərhədlərinə qədər uzanan xətt Avropadan Qafqaza və Xəzər regionuna qədər geniş coğrafiyanı əhatə edir.
Məlumatda vurğulanır ki, bu kontekstdə Türkiyə təkcə enerji tranzit ölkəsi deyil, həm də rəqəmsal məlumat dəhlizinə çevrilmək istiqamətində mühüm addım atır. “SOCAR Fiber” xətti Cənub Qaz Dəhlizi boyunca Azərbaycandan İtaliyaya qədər uzanan enerji infrastrukturu ilə inteqrasiya olunur və şərq-qərb oxu boyunca güclü, təhlükəsiz və yüksək ötürmə qabiliyyətinə malik məlumat ötürmə imkanları yaradır.
Enerji və kommunikasiya xətlərinin eyni marşrut üzrə inşası infrastruktur investisiyalarında sinerji formalaşdırır. Bu yanaşma həm vəsaitə qənaət edir, həm də enerji və rəqəmsal kommunikasiyanın təhlükəsizliyini artıraraq regional əməkdaşlığı gücləndirir.
Qeyd edilir ki, fiber-optik infrastrukturun təmin etdiyi təhlükəsiz və sürətli bağlantı rəqəmsal iqtisadiyyatın inkişafına birbaşa təsir göstərir. Data mərkəzlərinə və bulud hesablamalarına çıxış, onlayn təhsil və “ağıllı şəhər” tətbiqləri kimi sahələrdə etibarlı internet infrastrukturu texnoloji tərəqqinin fundamental şərtinə çevrilib.
Beləliklə, TANAP marşrutu boyunca həyata keçirilən investisiyalar sayəsində Türkiyənin şərqindən qərbinə uzanan fiber magistral yalnız mövcud deyil, gələcək rəqəmsal tələbatları da qarşılamağa imkan verir və regionun rəqəmsal transformasiyasında mühüm rol oynayır.