Finss.az - Bazar ertəsi günü Elon Mask, xAI tərəfindən hazırlanan yeni nəsil chatbot Grok-3-ü təqdim etdi və bunun əvvəlki versiyasından "daha güclü" olduğunu iddia etdi.

Mask, yeni botun GPT-4o, DeepSeek, Google və Anthropic kimi rəqiblərini əsas göstəricilərdə geridə qoyduğunu açıqlayıb.

xAI-nin təqdim etdiyi Grok-3, xüsusilə riyaziyyat, elm və proqramlaşdırma sahələrində mühüm irəliləyişlər əldə edib. Mask, modelin 24 saat ərzində daha da təkmilləşəcəyini vurğuladı və inkişafın sürətinə diqqət çəkdi. Lakin süni intellekt mütəxəssisləri arasında Grok-3 barədə qarışıq rəylər var. OpenAI-nin həmtəsisçisi Andrey Karpaty, modelin bəzi mürəkkəb məsələlərdə yaxşı nəticələr verdiyini, lakin "hələ də daha çox testə ehtiyac olduğunu" qeyd edib.

Eyni zamanda, xAI Grok-3 ilə əlaqədar yeni bir alət olan DeepSearch-i təqdim edib. DeepSearch, araşdırmalar, beyin fırtınası və məlumat analizi sahələrində istifadəçilərə kömək edəcək. Lakin Karpaty bu aləti Perplexity-nin DeepResearch aləti ilə müqayisə edərək, OpenAI-nin son versiyasının daha güclü olduğunu bildirdi.

xAI-nin yeni modelinin bazarda ciddi rəqabət yaratacağı hələ də sual altındadır. Pennsylvaniya Universitetinin professoru İtan Molik, Grok-3-ün bəzi metriklər üzrə OpenAI modellərini qabaqladığını, lakin hələ də açıq lider olmadığını qeyd edib. Geometric Intelligence-nin təsisçisi Qari Markus isə Grok-3-ü hələ də inqilabi bir irəliləyiş kimi görmür.

Bununla yanaşı, Grok-3-ün təqdimatı Mask ilə OpenAI-nin icraçı direktoru Sam Altman arasında artan rəqabət mühiti ilə üst-üstə düşüb. Mask, OpenAI-yə nəzarət etməyə çalışsa da, təklif etdiyi 97,4 milyard dollarlıq alış təklifi OpenAI-nin idarə heyəti tərəfindən rədd edilib.

Mask, Grok-3-ün daha yaxşı hesablama gücü ilə inkişaf etdiyini və yeni modelin artıq X Premium+ abunəçilərinə təqdim edildiyini bildirib. xAI, gələcəkdə Grok-3-ün daha da inkişaf edəcəyini və əvvəlki versiyaların mənbə kodlarını açmağı planlaşdırır.