Rusiya Taxıl İxracatçıları İttifaqı ölkənin yeni mövsümdə (1 iyul 2024-cü ildən başlayaraq) taxıl yığımı və ixracı ilə bağlı konsensus proqnozunu ciddi şəkildə azaldıb.

Fins.az "İnterfaks"a istinadən xəbər verir ki, buğda ixracına dair yeni proqnoz mayın 17-də açıqlanandan 14,7 faiz azdır.

Birliyin teleqram kanalında yerləşdirilən yeni konsensus proqnoza əsasən yeni mövsümdə Rusiyanın buğda ixracı 40 milyon ton təşkil edəcək. Qarğıdalı ixracı üzrə təxminlər 5,7 faiz azaldılaraq 5 milyon tona düşüb, arpa isə dəyişməz qalıb (4,3 milyon ton).

Ümumi taxıl ixracı üzrə konsensus proqnozu 53,5 milyon ton təşkil edir ki, bu da bir ay əvvəllə müqayisədə 9,5 faiz azdır.

Bu il iyunun ortalarına taxıl yığımı 125,1 milyon ton (7 faiz az), o cümlədən buğda - 79,3 milyon ton (8,6 faiz az), arpa - 18,6 milyon ton (3,6 faiz az), qarğıdalı - 14,9 milyon ton ( 2,6 faiz az) proqnozlaşdırılır.

Birliyin idarə heyətinin sədri Eduard Zernin İnterfaks-a bildirib ki, məhsul yığımı kampaniyası davam etdikcə həm məhsul, həm də ixracla bağlı proqnozlar azalmağa davam edib: "Biz ilk konsensus proqnozundan kənara çıxmaları nəzərə alırıq, çünki mənfi təbiət hadisələrinin - şaxta və quraqlığın məhsula təsirini qiymətləndirmək bizim üçün vacibdir".

Onun sözlərinə görə, cari mövsümdə buğda ixracı 50 milyon tondan çox olacaq, yəni dünya bazarına buğda tədarükünün azalması 10 milyon tondan çox qiymətləndirilir.

2023-cü ildə Rusiya 144,9 milyon ton taxıl, o cümlədən 92,8 milyon ton buğda toplayıb.