Özbəkistan Prezidenti “Özbəkistan Respublikasının 2024-cü il dövlət büdcəsi haqqında” 2023-cü il 25 dekabr tarixli ZRU-886 nömrəli Qanunu imzalayıb.

Fins.az Norma.uz-a istinadən xəbər verir ki, ümumi daxili məhsulun artımının 5,6−5,8%, sənaye artımının 6%, xidmətlərin 6,1%, kənd təsərrüfatının 4% olacağı proqnozlaşdırılır.

2024-cü ildə gözlənilən inflyasiya 8−10% təşkil edir.

Özbəkistanın İcmal Büdcəsi üçün maksimum kəsir ÜDM-in 4%-i səviyyəsində müəyyən edilib.

Qanuna əsasən, aşağıdakı vergi növləri tam həcmdə rayon və şəhər büdcələrinə köçürülür:

• fiziki şəxslər üçün əmlak vergisi;
• fiziki şəxslərdən torpaq vergisi;
• əmlakın icarəyə verilməsindən əldə edilən illik gəlir haqqında bəyannamə əsasında ödənilən, habelə fərdi sahibkarlar tərəfindən ödənilən fiziki şəxslərin gəlir vergisi;
• elektrik stansiyalarının ödədiyi vergi istisna olmaqla, su ehtiyatlarından istifadəyə görə vergi;
• qeyri-metal tikinti materialları üzrə yerin təkindən istifadəyə görə vergi.

Sənəd Milli Qanunvericilik Bazasında dərc edilib və 01.01.2024-cü il tarixindən qüvvəyə minir.

Günel Məlikzadə
Fins.az