Rayonun Sabiroba kəndindən olan təsərrüfatçı Nurlan Qurbanov bildirir ki, hazırda yığılan məhsulun böyük hissəsi Rusiya bazarlarına göndərilir. Məhsuldarlıq ötən illərə nisbətən zəif olsa da, qiymət təsərrüfatçıları qane edir.

“Hazırda bizdən məhsulun kiloqramını 4 manata alırlar. “Ala gilas”ı yığırıq. Gilas bizdən alındıqdan sonra bir neçə gün rayon ərazisindəki soyuducu anbarlarda saxlanılır. Burada yuyulub, müəyyən temperatura kimi soyudulduqdan sonra yük maşınları ilə Rusiya Federasiyasının müxtəlif bölgələrindəki bazarlara yola salınır. İyun ayının sonuna kimi məhsul yığımı davam edəcək”, - deyə Nurlan Qurbanov bildirib.

Xaçmaz rayonunda gilasın “Krım”, “Romanovka”, “Öküzürəyi”, “Napoleon” və başqa növləri yetişdirilir. Gilasın yetişdirilməsinin böyük xərc tələb etdiyini söyləyən sahibkarlar hazırkı satış qiymətinin onları qane etdiyini deyirlər.

“Bu gündən kütləvi yığıma başlamışıq. Gilası vaxtında toplamaq lazımdır. Hava yağışlı keçir. Məhsul ağacda qalsa, yağış dəyən kimi çatlayıb xarab olacaq. Buna görə də yığım üçün əlavə qüvvə cəlb edirik. Günəmuzd işləyən fəhlələr gilasın bir kiloqramını 50 qəpiyə yığır. Bir nəfər gün ərzində 100 kiloqramdan çox gilas toplaya bilir”, - təsərrüfatçı Emin Baxışov söyləyib.

Son illər rayonda gilas bağlarının sahəsi xeyli artıb. Təsərrüfatçılar bunu gilas bağlarının alma, şaftalı və digər ənənəvi bağlara nisbətən daha çox gəlir gətirməsi ilə əlaqələndirirlər. Yeni salınan bağlar əsasən intensiv üsulla becərilir.

Respublikamızın şimal bölgəsində gilas yetişdirməklə məşğul olan fermerlər bu meyvəni Rusiya ilə yanaşı, digər xarici bazarlara da ixrac etmək imkanının olduğunu deyirlər. Bu isə ölkəmizə xarici valyutanın daxil olmasında əhəmiyyətli rol oynaya bilər.

© Azərtac