Azərbaycan Respublikası Kənd Təsərrüfatı Nazirliyi ilə BMT-nin Ərzaq və Kənd Təsərrüfatı Təşkilatının (FAO) birgə həyata keçirdiyi FAO-Azərbaycan Tərəfdaşlıq proqramı çərçivəsində süni mayalanma mütəxəssisləri üçün təşkil edilən təlimlər sona çatıb.

FAO-nun Azərbaycandakı nümayəndəliyindən bildirilib ki, Aqrar Kredit və İnkişaf Agentliyinin (AKİA) koordinasiyası ilə FAO tərəfindən həyata keçirilən “Azərbaycanda iribuynuzlu damazlıq heyvanlarının cins tərkibinin yaxşılaşdırılması və səmərəli yemləmə sistemlərinin yaradılması vasitəsilə iribuynuzlu heyvandarlığın inkişaf etdirilməsi” layihəsi çərçivəsində 60 mütəxəssisə təşkilatın yerli və beynəlxalq ekspertləri tərəfindən təlim keçirilib. Həmin şəxslər sertifikat və müvafiq avadanlıqlarla təmin olunublar. Layihə, həmçinin Respublika Süni Mayalanma Mərkəzinin bu sahədəki maddi-texniki bazasının gücləndirilməsinə də dəstək verib.

Kənd Təsərrüfatı Nazirliyinin, AKİA-nın, FAO-nun və Mərkəzin nümayəndələri təlimlərin bağlanış mərasimində təlimi uğurla başa vuran mütəxəssislərə sertifikat və müvafiq süni mayalanma avadanlıqları təqdim ediblər.

AKİA-nın sədr müavini Leyla Məmmədova bildirib ki, bu sertifikat və avadanlıqlar yeni mütəxəssislərin fasiləsiz və səmərəli fəaliyyətlərini təmin edəcək.

Qeyd olunub ki, təlimi uğurla keçmiş məzunlar hazırda ölkənin bir çox regionlarında öz fəaliyyətlərini davam etdirirlər və mütəmadi olaraq onların peşəkarlığının, bilik və bacarıqlarının inkişaf etdirilməsi ilə əlaqədar tədbirlərin həyata keçirilməsi nəzərdə tutulub. Bu da ölkədə süni mayalandırma mütəxəssislərinin sayının artırılması ilə heyvandarlığın cins tərkibinin yaxşılaşdırılmasına, heyvandarlığın inkişafına, ərzaq təhlükəsizliyinə töhfə verməklə yanaşı, ölkədə aqrar sahənin məşğulluğun payının artırılmasında mühüm rol oynayacaq.