Azərbaycan şərabları Çində alkoqollu içkilər sahəsində ən nüfuzlu beynəlxalq sərgi hesab edilən Çin (Çendu) qida və içkilər sərgisində (CFDF) nümayiş etdirilir.
İqtisadiyyat Nazirliyinin dəstəyi, AZPROMO və Azərbaycanın Çindəki ticarət nümayəndəliyinin birgə təşkilatçılığı ilə ölkəmizin 13 aparıcı şirkətinin şərab və digər alkoqollu içkiləri “Made in Azerbaijan” vahid ölkə stendində təqdim olunur. Sərgi çərçivəsində Azərbaycanın rəqabətqabiliyyətli məhsullarının ixracının artırılmasına dair müzakirələr aparılır, potensial müştərilərlə görüşlər keçirilir.
Çendu sərgisi Çində ən uzun tarixə malik, ən böyük və ən nüfuzlu alkoqollu içkilər üzrə beynəlxalq tədbir hesab olunur. Sərgi şərab istehsalçıları, idxalçıları və distribüterləri üçün səmərəli ticarət platforması olmaqla, xüsusən xarici məhsulların Çində tanıdılması və satışının təşviqi üçün xüsusi əhəmiyyət daşıyır. Çin qida və içkilər sahəsində peşəkar sərgi olan CFDF 1955-ci ildən bəri ildə 2 dəfə (yaz və payız) keçirilir. Ümumi ekspozisiya sahəsi 100 min kvadratmetr olan və 3 min şirkətin məhsulunun nümayiş olunduğu budəfəki sərgini təxminən 150 min peşəkar alıcının ziyarət edəcəyi gözlənilir.
Azərbaycanın Çindəki ticarət nümayəndəsi Teymur Nadiroğlu AZƏRTAC-ın müxbirinə müsahibəsində bildirib ki, “Made in Azerbaijan” brendi ilə istehsal olunan məhsulların Çinə ixracının genişləndirilməsi məqsədilə genişmiqyaslı tədbirlər həyata keçirilir. Bura Çinin müxtəlif şəhərlərində Azərbaycanın ticarət evlərinin açılması, Çində təşkil olunan sərgilərdə iştirak, Çinin marketlər şəbəkəsində Azərbaycan məhsullarının satışının təşkili daxildir.
Ticarət nümayəndəsi deyib: “Çində təşkil olunan nüfuzlu sərgilərə mütəmadi iştirak Azərbaycan məhsullarının Çin bazarında təşviq mexanizmində vacib rol oynayır. Keçən il Çində 4 sərgidə Azərbaycan vahid ölkə stendi ilə iştirak edib. Bir çox ölkələr pandemiyanın iqtisadi fəaliyyətlərdə yaratdığı çətinliklər səbəbindən həmin sərgilərdə iştirakdan imtina etmişdilər. Biz isə əksinə, iştirakımızla heç bir çətinliyə baxmayaraq, Azərbaycan şirkətlərinin öz öhdəliklərini yerinə yetirməyə hazır olduğunu və Çin bazarında maraqlı olduğunu göstərdik”.
T.Nadiroğu əlavə edib ki, il ərzində Azərbaycan daha bir neçə nüfuzlu sərgidə iştirak etməyi planlaşdırıb. Ticarət nümayəndəliyi ticarətin təşviqi, məhsullarımızın tanıdılması, satış kanallarının genişləndirilməsi, yeni tərəfdaşların tapılması və bazarın araşdırılması istiqamətində fəaliyyətini genişləndirir. Nümayəndəlik, həmçinin investisiyaların cəlb edilməsində, şirkətlərimizin Çində hüquq və mənafelərinin qorunmasında, ümumi olaraq iqtisadi əlaqələrin genişlənməsində fəal iştirak edir.
