"2019-cu ildə fermerlər tərəfindən təqribən 100 min tona yaxın azot gübrəsi istifadə edilib".

Bunu Kənd Təsərrüfatı Nazirliyi yanında Aqrar Xidmətlər Agentliyinin (AXA) sədri Seymur Mövlayev gübrə, toxum, pestisid təchizatçıları ilə görüşdə jurnalistlərə açıqlamasında deyib. 

O vurğulayıb ki, 2020-ci ildə özəl sektorda fəaliyyət göstərən gübrə satan şirkətlərin sayı çoxalıb: "Aqrar Xidmətlər Agentliyi olaraq biz onların qeydiyyatını yeni təchizatçılar portalında qeydiyyatdan keçirmişik. Fevralın ortalarından başlayaraq, fermerlərin kartlarına ödənişlər həyata keçirildikdən sonra gübrə təchizatçıları fermerlərə satış həyata keçirəcəklər. Fermerlər də onlara verilmiş fermer kartı vasitəsilə subsidiyalardan istifadə edəcəklər. Ümid edirik ki, prosesin özü gübrə bazarında qiymətin düşməsinə gətirəcək, bu proseslərdə qazanan tərəf fermerlər olacaq. Bu, həmçinin sağlam rəqabət mühitinin yaranmasına səbəb olacaq və bu proseslərin təmin edilməsində Kənd Təsərrüfatı Nazirliyi fermerlərin yanında olacaq ki, şirkətlər süni qiymət artımına yol verməsinlər". 

S.Mövlayev xatırladıb ki, "Aqrolizinq" ASC tərəfindən kifayət qədər gübrə gətirilirdi. Bu bazarın daha da təkmilləşdirilməsi və özəl sektorun canlanması üçün "Aqrolizinq" müəyyən güzəştlər etdi. ASC gübrə bazarının 80 faizinə qədərini təmin edirdi. "Aqrolizinq" Kənd Təsərrüfatı naziri İnam Kərimov tərəfindən tapşırıq aldıqdan sonra gübrə təchizatlarını azaltmışdılar ki, özəl sektorda fəaliyyət göstərən gübrə təchizatları bu sahədə fəaliyyətlərini genişləndirsinlər". 

Xatırladaq ki, hazırda Elektron Kənd Təsərrüfatı İnformasiya Sistemində 83-dən artıq gübrə və pestisid təchizatçısı, 250-dən çox toxumçu qeydiyyatdan keçib.

© Report