Çində yayılan koronavirus təhlükəsi Azərbaycanın ixrac potensialını stimullaşdıracaq.

Bu barədə danışan Kənd Təsərrüfatı Nazirliyi yanında Aqrar Tədqiqatlar Mərkəzinin direktoru Firdovsi Fikrətzadə deyib ki, Azərbaycan Rusiya bazarının pomidor təchizatında birinci yerdədir:

“İkinci Mərakeş, üçüncü Çindir. Biz Rusiyaya illik 190 milyon dollarlıq pomidor ixrac edirik. Çinin ixrac potensialı isə 100 milyon dollarlıq idi. Şübhəsiz ki, Çin təchizatçılarının Rusiya bazarından geri çəkilməsi bizim ixracatçılarımız üçün yeni imkan yaradır. Ona görə də bizim pomidor ixracatçılarımızın Rusiya üçün pomidor ixrac imkanları genişlənir. Bu, təkcə pomidor üçün deyil, digər tərəvəzlərə də aiddir. Biz lazımi səviyyədə soğan, sarımsaq istehsalını artıra bilsək, yaranmış boşluqdan yararlana bilərik”.

Nazirlik rəsmisi bildirib ki, Çin məhsullarının geri çəkilməsi istənilən halda ixracı artıracaq:

“Amma bir məsələ var ki, kənd təsərrüfatında hansısa məhsulun istehsalını kəskin artırmaq çətindir. Doğrudur, istixana şəraitində yetişdirilən tərəvəz sənaye üsullu olduğuna görə, yetişməni artıra biləcəklər. Amma çox kəskin olmaya da bilər. Sadəcə ixracın müddəti uzana bilər. İstixanaların iş istehsalının təşkili ilə bağlı işlərə payızdan başlanılır. Adətən Rusiyanın özündə məhsul yetişəndə, bizdə ixrac zəifləyirdi. Ona görə də ixrac müddəti artırlacaq. Ümumilikdə istənilən halda ixrac artımı olacaq. Çünki söhbət 100-130 min tonluq Çin məhsulunun aradan qalxmasından gedir”.

Qeyd edək ki, koronavirus təhlükəsi səbəbilə Rusiyanın Çinlə sərhədi bağlandığına görə, bazarlarda meyvə-tərəvəz qiymətləri kəskin bahalaşıb. Azərbaycandan  Rusiyaya ixrac edilən xiyarın 1 kiloqramı 400 rubl (10,7 manat), pomidorun qiyməti isə 700 rubla (18,7 manat) çatıb. 

Modern.az