Azərbaycan Premyer Liqasının oyunları koronavirus epidemiyası ilə əlaqədar təxirə salına bilər.

Fins.az xəbər verir ki, bunu apasport.az saytına Peşəkar Futbol Liqasının (PFL) prezidenti Ramin Musayev deyib.

PFL rəhbəri bildirib ki, martın 21-22-də keçirilməsi nəzərdə tutulan XXII turun dayandırılması istisna deyil. Bu isə UEFA-nın martın 17-də assosiasiyaların nümayəndələri ilə təşkil edəcəyi videomüşavirədən sonra bilinəcək: “XXI turun oyunları azarkeşsiz keçiriləcək. Bununla bağlı hansısa dəyişiklik yoxdur. Ancaq ondan sonra Premyer Liqanı dayandıra bilərik. Çünki martın 17-də UEFA-nın iclası olacaq. Həmin görüşdə bütün turnirlərin təxirə salınması qərara alına bilər. Belə olarsa, biz də çempionatı dayandıracağıq. Bir sözlə, qərarımızı UEFA-nın iclasına əsasən verəcəyik”.

Musayev həmçinin koronavirusun yayılma təhlükəsini nəzərə alaraq, XXI turla bağlı klublara müraciət etdiklərini də vurğulayıb. O, həftəsonu matçlarda böyüklərin topdaşıyan kimi meydanın kənarında olmalarını məsləhət görüb: “Bildiyiniz kimi, uşaqların evdən çıxmamaları üçün məktəblər bağlanıb. Amma topdaşıyan uşaqlar həmişə stadionlarda olurlar. Klublara müraciət etdik ki, oyun üçün azyaşlı uşaqları top daşımağa göndərməsinlər, bu işi böyüklər görsün”.

Qeyd edək ki, Premyer Liqanın XXI turunun oyunları martın 14-15-də keçiriləcək.