Finss.az - Tibbi elmi dairələrdə yaşlanmanı ləngidə və insan ömrünü uzada biləcək dərmanlara maraq sürətlə artır.

Son tədqiqatlar göstərir ki, şəkərli diabetin müalicəsində geniş istifadə olunan metformin preparatı bu baxımdan ümidverici nəticələr verir.

The Journals of Gerontology adlı elmi jurnalda dərc olunan yeni araşdırmanın nəticələrinə görə, metformin postmenopoz dövründə olan və 2-ci tip şəkərli diabetdən əziyyət çəkən qadınların 90 yaşa qədər yaşamaq ehtimalını artırır.

Tədqiqatda metformin preparatı şəkərli diabetin digər müalicə vasitələrindən biri olan sulfonilüre törəmələri ilə müqayisə olunub. Nəticədə məlum olub ki, metformin qəbul edən qadınların 90 yaşa qədər yaşamaq şansı digər preparatları qəbul edənlərlə müqayisədə 30% daha yüksəkdir.

Mütəxəssislər bildirir ki, bu nəticələr metforminin yalnız diabetlə mübarizədə deyil, həm də yaşlanmanın qarşısını almaqda potensial imkanlarını göstərir. Lakin araşdırma müəllifləri vurğulayırlar ki, əldə edilən nəticələrin dəqiqliyini təsdiqləmək və səbəb-nəticə əlaqəsini tam aydınlaşdırmaq üçün əlavə plasebo-nəzarətli klinik tədqiqatlara ehtiyac var.

Qeyd edək ki, bu nəticələr ABŞ-da aparılan və 30 ildən çox davam edən “Qadınların Sağlamlığı Təşəbbüsü” adlı genişmiqyaslı milli kohort araşdırmasının məlumatları əsasında əldə olunub.

Mövzu ilə bağlı tədqiqatlar davam edir və alimlər metforminin gələcəkdə yaşlanma əleyhinə dərman kimi istifadə olunma ehtimalını da istisna etmirlər.