Finss.az - Kaliforniya Universitetinin (Berkeley) alimlərindən ibarət bir tədqiqat qrupu əvvəllər heç kimin görmədiyi tamamilə yeni bir rəngin kəşf edildiyini açıqlayıb.

Alimlər bu rəngi “olo” adlandırıblar və onun yalnız lazer texnologiyası ilə torlu qişaya təsir edilərkən görülə biləcəyini bildirirlər.

Tədqiqatçılar bildirirlər ki, yeni rəng mavi və yaşıl çalarların qarışığını xatırlatsa da, onu adi monitor və ya çap vasitəsilə göstərmək mümkün deyil. Alimlərdən biri, görmə qavrayışı üzrə mütəxəssis Ostin Roorda deyib:

“Bu, bizim tanıdığımız heç bir rəngə bənzəmir. Monitorlarda gördüyümüz versiya onun yalnız kölgəsidir. Həqiqi ‘olo’ rəngi ilə müqayisədə çox sönük qalır.”

Eksperiment zamanı alimlər lazer impulslarından istifadə edərək insan gözünün torlu qişasındakı fərdi hüceyrələri stimullaşdırıblar. Bu müdaxilə görmə qabiliyyətini təbii hüdudlardan kənara çıxararaq daha əvvəl heç vaxt rast gəlinməyən bir rəng siqnalı yaradıb.

Tədqiqatın nəticələri nüfuzlu Science Advances jurnalında dərc olunub. Nəticə olaraq yaranan rəng ləkəsinin ölçüsü dolunayın iki qatı böyüklüyündə olub. Alimlər “olo” rənginin firuzə rənginə yaxın olduğunu qeyd etsələr də, onun yaratdığı vizual hissin heç bir rənglə tam müqayisə olunmayacağını vurğulayıblar.

Bununla belə, London Universitetinin Saint George filialının vizual incəsənət üzrə mütəxəssisi Con Barbur bu iddialara skeptik yanaşır. O hesab edir ki, “olo” rəngi əslində yeni bir rəng deyil, sadəcə adi qırmızı-yaşıl mexanizmi olan gözlərlə daha doymuş yaşıl kimi qavranıla bilən bir çaladır.

Yeni rəngin gələcəkdə texnologiya, sənət və optika sahəsində necə tətbiq oluna biləcəyi isə maraqla gözlənilir.