Afrikada fəaliyyət göstərən müdafiə texnologiyaları startapı Terra Industries yeni investisiya raundunda $22 milyon əlavə vəsait cəlb edib.

Finss.az xəbər verir ki, Lux Capital-ın rəhbərlik etdiyi bu raund sayəsində şirkətin ümumi maliyyələşməsi $34 milyonadək yüksəlib.

2024-cü ildə Nathan Nwachuku (22) və Maxwell Maduka (24) tərəfindən yaradılan Terra Industries, Afrika ölkələrinin təhlükəsizlik və infrastrukturlarını qorumaq üçün avtonom müdafiə sistemləri və monitorinq həlləri üzərində çalışır. Şirkət artıq $2,5 milyon kommersiya gəliri əldə edib və $11 milyard dəyərində aktivləri qoruyur.

Yeni investisiya raunduna 8VC, Nova Global və Resilience17 Capital də qatılıb. Terra Industries həmçinin Səudiyyə Ərəbistanında AIC Steel ilə birgə istehsal müəssisəsi quraraq avadanlıq və təhlükəsizlik sistemlərinin istehsalını genişləndirəcək.

CEO Nathan Nwachuku bildirib ki, prioritet terrorizm və infrastruktur təhlükəsizliyi risklərinin yüksək olduğu Sub-Sahara və Sahel regionlarıdır. Şirkət yaxın aylarda daha çox hökmət və kommersiya müqavilələri açıqlamağı və digər Afrika ölkələrinə genişlənməyi planlaşdırır.