Finss.az - ABŞ prezidenti Donald Tramp federal hökumətin maliyyələşdirilməsini nəzərdə tutan qanun layihəsini imzalayıb.

Bununla da şənbə günündən qüvvədə olan federal qurumların qismən fəaliyyət dayanması aradan qaldırılıb.

Tramp Ağ Evdə jurnalistlərə bildirib ki, imzalanan konsolidə edilmiş büdcə ayırmaları qanunu federal hökumətin işinin dərhal bərpasına və əməliyyatların böyük hissəsinin 2026-cı maliyyə ilinin sonunadək — 30 sentyabradək maliyyələşdirilməsinə imkan verəcək.

Qanun layihəsi bundan əvvəl Nümayəndələr Palatasında minimal səs fərqi ilə qəbul edilib — 217 konqresmen lehinə, 214 konqresmen əleyhinə səs verib.

Maliyyələşmə 31 yanvar gecə yarısından qismən dayandırılmışdı. Senatda demokratlar və respublikaçılar xərclərlə bağlı beş qanun layihəsi üzrə razılığa gəlsələr də, Daxili Təhlükəsizlik Nazirliyinin tam maliyyələşdirilməsi sənəddən çıxarılıb. Qurum üçün yalnız iki həftəlik müvəqqəti maliyyələşmə təsdiqlənib.

Bu müddət ərzində tərəflər razılığa gələ bilməsə, ABŞ-da yenidən məhdud miqyaslı qismən “shutdown” riski yarana bilər.

Qəbul edilən paket Müdafiə, Səhiyyə, Maliyyə nazirlikləri, federal məhkəmə sistemi və digər dövlət qurumlarının fəaliyyətinin davamı üçün vəsait ayrılmasını təmin edir.