Finss.az - Dünyanın ən iri hasilat şirkətlərindən olan Glencore Konqo Demokratik Respublikasındakı mis aktivlərinin bir hissəsinin satışı ilə bağlı ABŞ hökumətinin dəstəyi ilə yaradılmış Orion Critical Mineral Consortium (Orion CMC) ilə anlaşma memorandumu imzalayıb.

Şirkətin açıqlamasına görə, söhbət Mutanda Mining və Kamoto Copper Company (KCC) layihələrində 40%-lik payın mümkün əldə olunmasından gedir. Hər iki aktivin ümumi bazar dəyərinin təxminən 9 milyard dollar olduğu qiymətləndirilir.

Razılaşma ABŞ və onun tərəfdaş ölkələri üçün kritik mineralların — xüsusilə mis və kobaltın — etibarlı tədarükünü gücləndirməyə yönəlib. Saziş çərçivəsində Orion CMC istehsalın müvafiq hissəsinin satış hüququnu əldə edəcək və şirkətlərin idarəetməsində müstəqil direktorlar təyin edə biləcək. Aktivlərin operativ idarəçiliyi isə Glencore-da qalacaq.

Tərəflər həmçinin Konqo və Afrikanın “Mis kəməri” bölgəsində yeni layihələrin və əlavə mədən aktivlərinin alınması imkanlarını da araşdırmağı planlaşdırır.

Orion CMC 2025-ci ilin oktyabrında ABŞ-ın DFC inkişaf maliyyə korporasiyası və Əbu-Dabinin ADQ suveren fondu tərəfindən yaradılıb. Konsorsiumun əsas məqsədi ABŞ və müttəfiq ölkələr üçün kritik minerallar üzrə tədarük zəncirinin şaxələndirilməsi və təhlükəsizliyinin artırılmasıdır.

2025-ci ildə Glencore-un Konqodakı mis istehsalı 10% artaraq 247,8 min tona çatıb və bu göstərici şirkətin qlobal mis hasilatının 29%-ni təşkil edib. Kobalt istehsalı isə ixrac məhdudiyyətləri fonunda 5% azalaraq 36,1 min ton olub.