Finss.az xəbər verir ki, çərşənbə axşamı neft qiymətləri ucuzlaşıb və bazar ötən həftə müşahidə olunan güclü rallidən sonra korreksiya mərhələsini davam etdirib. Treyderlər qlobal bazarda kifayət qədər neft tədarükünün mövcud olacağına əmin olduqları üçün qiymətlərə satış təzyiqi artıb.

Qazaxıstanın Energetika Nazirliyi bildirib ki, “Tengizchevroil” MMC Korolev yatağında neft hasilatını bərpa edib və yaxın gələcəkdə Tengiz yatağında da hasilatın yenidən başlanacağı gözlənilir. Xatırladaq ki, yanvarın 19-da elektrik enerjisinin paylanması sistemlərində yaranan problemlər səbəbindən hər iki yataqda hasilat dayandırılmışdı.

Eyni zamanda, Bloomberg mənbələrinə istinadən xəbər verir ki, neft hasilatında könüllü məhdudiyyətlərdə iştirak edən səkkiz OPEC+ ölkəsi fevralın 1-də keçiriləcək onlayn iclasda mart ayı üçün mövcud hasilat planını qoruyub saxlayacaq. Bu qərar bazarda tədarükün stabil qalacağına dair gözləntiləri gücləndirib.

Analitiklərin fikrincə, hasilatın bərpası və OPEC+ tərəfindən istehsal siyasətində dəyişiklik edilməməsi neft qiymətləri üzərində yaxın müddətdə təzyiq yarada bilər.