Finss.az xəbər verir ki, Almaniyanın enerji nəhəngi RWE ABŞ-ın Texas LNG Brownsville MMC şirkəti ilə 20 illik qəti alış müqaviləsi imzalayıb. Razılaşmaya əsasən, RWE illik 1 milyon ton mayeləşdirilmiş təbii qaz (LNG) alacaq.

Məlumata görə, ildə 4 milyon ton LNG istehsal gücünə malik Texas LNG layihəsi ABŞ-ın Texas ştatında Glenfarne Group tərəfindən hazırlanır. Layihə ABŞ-ın LNG ixrac potensialının genişləndirilməsi baxımından strateji əhəmiyyət daşıyır.

Müqavilənin maliyyə və kommersiya şərtləri açıqlanmasa da, bildirilir ki, RWE əldə etdiyi LNG-ni Avropaya və dünyanın digər regionlarına tədarük edə biləcək. Qeyd olunur ki, Amerika LNG istehsalçıları adətən qazı FOB (Free On Board) şərtləri ilə satırlar, bu isə alıcıya yüklərin istiqamətini müstəqil şəkildə müəyyən etmək imkanı yaradır.

Analitiklərin fikrincə, bu razılaşma Avropanın enerji təhlükəsizliyinin gücləndirilməsi və RWE-nin uzunmüddətli qaz təchizatının şaxələndirilməsi baxımından mühüm addımdır. ABŞ LNG-si Avropa bazarında artan tələbat fonunda əsas alternativ mənbələrdən biri kimi ön plana çıxır.