Finss.az xəbər verir ki, Türkiyənin enerji və təbii sərvətlər naziri Alparslan Bayraktar sosial media hesabında paylaşdığı açıqlamada Amerikanın nəhəng enerji şirkəti ExxonMobil-in törəmə şirkəti olan ESSO ilə Türkiyənin dövlət neft şirkəti TPAO arasında neft və qaz kəşfiyyatı üzrə anlaşma memorandumu imzalandığını bildirib.

Razılaşmaya əsasən, tərəflər Türkiyənin Qara dəniz və Aralıq dənizi hövzələrində neft və qaz ehtiyatlarının kəşfiyyatı istiqamətində birgə fəaliyyət göstərəcəklər. Memorandum həmçinin tərəflər arasında razılaşdırılacaq digər potensial kəşfiyyat bölgələrini də əhatə edir.

Nazir Alparslan Bayraktar vurğulayıb ki, Türkiyə enerji müstəqilliyinə nail olmaq məqsədilə beynəlxalq əməkdaşlığı genişləndirərək ölkənin enerji potensialını daha da gücləndirməyə çalışır. Onun sözlərinə görə, bu cür tərəfdaşlıqlar həm texnoloji imkanların artırılmasına, həm də yeni enerji resurslarının üzə çıxarılmasına mühüm töhfə verir.

Qeyd edək ki, Türkiyə son illərdə enerji sektorunda yerli və xarici şirkətlərlə əməkdaşlığı intensivləşdirərək neft və qaz kəşfiyyatı sahəsində aktiv fəaliyyət göstərir. Yeni razılaşmanın ölkənin enerji strategiyasında mühüm rol oynayacağı gözlənilir.